રાજકોટ, લોધિકા અને પડધરી તાલુકાના ૧૮૦ ગામોનું વિશાળ કાર્યક્ષેત્ર ધરાવતા રાજકોટના બેડી માર્કેટ યાર્ડમાં આજે સવારે થયેલી હરાજીમાં પાંચ લાખ કિલો સૂકા મરચાની આવક થઇ હતી. રાજકોટ તાલુકામાં આ વર્ષે મરચાનું વિક્રમી વાવેતર અને પુષ્કળ ઉત્પાદન થયું છે તેના લીધે મરચાના વ્યાપારમાં ગોંડલ માર્કેટ યાર્ડની મોનોપોલી પણ તૂટી છે.
વિશેષમાં રાજકોટ માર્કેટ યાર્ડના વેપારી સૂત્રોએ જણાવ્યું હતું કે આજે સીઝનના અંતે યાર્ડમાં સુકા મરચાંની ૧૨૫૦૦ ભારીની આવક હતી, દરેક ભારીમાં સરેરાશ ૪૦ કિલો વજન હોય છે એ મુજબ આજે પાંચ લાખ કિલો મરચાની આવક થઇ હતી. મરચા ભરેલા વાહનોને માર્કેટ યાર્ડમાં ક્રમવાર પ્રવેશ આપી મરચાંની ઉતરાઇ કરાવવામાં આવી હતી. રાજકોટ માર્કેટયાર્ડના ચેરમેન જયેશભાઈ બોઘરા, ડિરેક્ટરો તેમજ સ્ટાફ દ્વારા ઉતરાઇની વ્યવસ્થા કરાઇ હતી.