ભારતમાં ચાંદ દેખાયો છે. ગુરુવાર, 11 એપ્રિલના રોજ જમ્મુ-કાશ્મીર અને લદ્દાખ સિવાય સમગ્ર દેશમાં ઈદ-ઉલ-ફિત્રનો તહેવાર ધામધૂમથી ઉજવવામાં આવશે. જમ્મુ-કાશ્મીર અને લદ્દાખમાં ચાંદ એક દિવસ પહેલા દેખાયો હતો, તેથી આ બંને વિસ્તારોમાં 10 એપ્રિલ બુધવારે ઈદની ઉજવણી કરવામાં આવી હતી.

રાજધાની દિલ્હી સહિત દેશના ઘણા મોટા શહેરોમાં ચાંદ દેખાઈ રહ્યો છે. બુધવારે સાંજે લગભગ 7.15 કલાકે ઈદનો ચાંદ દેખાયો હતો. 11 એપ્રિલ, ગુરુવારે દેશભરમાં ઈદ-ઉલ-ફિત્રનો તહેવાર ધામધૂમથી ઉજવવામાં આવશે. જામા મસ્જિદની ચાંદ કમિટીએ થોડા સમય પહેલા જ ચાંદ દેખાયાની જાહેરાત કરી છે. જામા મસ્જિદમાં ગુરુવારે સવારે 6:30 કલાકે અને ફતેહપુરી મસ્જિદમાં સવારે 7:30 કલાકે ઈદની નમાજ પઢવામાં આવશે.

મહત્વનું છે કે જમ્મુ-કાશ્મીર અને લદ્દાખમાં ચાંદ એક દિવસ પહેલા જ દેખાઈ ગયો હતો, જેના કારણે ત્યાં 10 એપ્રિલ બુધવારે ઈદનો તહેવાર મનાવવામાં આવ્યો હતો. વિશ્વમાં ઇસ્લામના કેન્દ્ર તરીકે ઓળખાતા સાઉદી અરેબિયામાં પણ બુધવારે ઇદનો તહેવાર ઉજવવામાં આવ્યો હતો.

ઈદ-ઉલ-ફિત્રની સૌથી ખાસ વાત એ છે કે હિજરી કેલેન્ડરના કારણે આ તહેવારની તારીખ દર વર્ષે બદલાતી રહે છે. આ કેલેન્ડર ચાંદ પર આધારિત છે. આમાં ચાંદની વધતી અને અસ્ત થતી ગતિ અનુસાર દિવસોની ગણતરી કરવામાં આવે છે.