આજે સતત બીજા દિવસે રાજકોટ સહિત રાજ્યના મોટાભાગના વિસ્તારમાં સવારે વાતાવરણમાં ભેજનું પ્રમાણ વધારે રહ્યું છે અને તેના કારણે રાજકોટ પોરબંદર અને દિવમાં ઝાકળ વર્ષા થવા પામી હતી. રાજકોટમાં ૯૧ પોરબંદરમાં ૯૫ અને દીવમાં ૯૩% ભેજ આજે સવારે નોંધાયો છે.
​​​​​​​
હવામાન ખાતાના જણાવ્યા મુજબ અરબી સમુદ્રમાં મોટા પ્રમાણમાં ભેજવાળા વાદળો દરિયાની સપાટીથી ૧.૫ કીલોમીટરની ઊંચાઈ પર જોવા મળી રહ્યા છે અને તે નોર્થ વેસ્ટ દિશામાં આગળ વધતા હોવાથી ગુજરાત સહિત દેશના અનેક ભાગોમાં સવારે ભેજવાળું વાદળીયું વાતાવરણ જોવા મળે છે.
બદલાયેલા વાતાવરણને કારણે ૩૭ ડિગ્રી સુધી પહોંચી ગયેલું મહત્તમ તાપમાન ધીમે ધીમે ઓછું થઈ રહ્યું છે. આજે વલસાડ સિવાય રાજ્યમાં તમામ સ્થળે મહત્તમ તાપમાન ૩૫ ડિગ્રી થી નીચું રહ્યું છે. લઘુતમ તાપમાનમાં પણ સામાન્ય વધઘટ રહેવા પામી છે. આજે ભુજમાં ૧૯ નલિયામાં ૧૭.૨ ભાવનગરમાં ૧૯.૬ દ્વારકામાં ૨૩.૬ ઓખામાં ૨૨.૩ પોરબંદરમાં ૨૦.૬ રાજકોટમાં ૧૯.૭ વેરાવળમાં ૨૨.૭ ડીગ્રી લઘુતમ તાપમાન રહ્યું છે.