ટ્રમ્પ હાઉસ રિપબ્લિકનના એક ફંડરેજિંગ ગાલાને સંબોધિત કરી રહ્યા હતા. ટ્રમ્પે પોતાના ભાષણમાં કેટલાક દેશોના નેતાઓની નકલ કરતા કહ્યું કે, 'પ્લીઝ, પ્લીઝ સર ડીલ કરી લો. હું કંઈ પણ કરીશ, કંઈ પણ સર.' તેમનો ઈશારો એવા દેશો તરફ હતો જેઓ અમેરિકાના વધતા ટેરિફથી પરેશાન છે અને સમાધાન કરવાનો પ્રયાસ કરી રહ્યા છે.

આ નિવેદન પહેલાં વ્હાઈટ હાઉસે પુષ્ટિ કરી હતી કે, 9 એપ્રિલથી ચીન પર લાગતા ટેરિફમાં 104% વધારો કરવામાં આવી રહ્યો છે. ટ્રમ્પે ચેતવણી આપી હતી કે, જો ચીન મંગળવાર સુધીમાં તેના 34%ના જવાબી ટેરિફને નહીં હટાવે તો અમેરિકા તેના ટેરિફમાં વધુ 50 ટકાનો વધારો કરશે.

પોતાના સંબોધનમાં ટ્રમ્પે એવી પણ જાહેરાત કરી છે કે, ફાર્મા સેક્ટર પર ટૂંક સમયમાં ભારે ટેરિફ લાદવામાં આવશે. તેમણે કહ્યું કે, 'અમે અમારી ફાર્મા દવાઓ ખુદ નથી બનાવતા, તે અન્ય દેશોમાં બને છે. અમેરિકામાં તે જ દવા 10 ગણી મોંઘી વેચાય છે. તેથી જ અમે ફાર્મા પર એવો ટેરિફ લાદીશું કે કંપનીઓ ચીન અને અન્ય દેશો છોડીને અમેરિકામાં પોતાના પ્લાન્ટ સ્થાપશે.

આ અગાઉ એપ્રિલની શરૂઆતમાં ટ્રમ્પે ભારત, ચીન, બ્રાઝિલ, જાપાન અને યુરોપિયન યુનિયનથી થતી તમામ આયાત પર નવા ટેરિફની જાહેરાત કરી હતી. હવે ફાર્મા સેક્ટરને પણ ટાર્ગેટ કરવામાં આવી રહ્યું છે. આ નીતિઓને કારણે વૈશ્વિક બજારોમાં અસ્થિરતા અને સાથી દેશોમાં ચિંતા વધી ગઈ છે.