મહારાષ્ટ્રના પૂર્વ મંત્રી અને NCP નેતા બાબા સિદ્દીકીની હત્યા બાદ ઘણા મોટા ખુલાસા થઈ રહ્યા છે. બાબા સિદ્દીકીને વાય કેટેગરીની સુરક્ષા આપવામાં આવી હતી. ત્યારે સવાલ એ થાય છે કે તેમની હત્યા કેવી રીતે કરવામાં આવી?  ચાર શૂટરોએ બાબા સિદ્દીકીની હત્યા કરી હોવાના સમાચાર સામે આવ્યા છે. પોલીસ સૂત્રોના જણાવ્યા અનુસાર બાબા સિદ્દીકીની હત્યા માટે દરેક શૂટરને 50,000 રૂપિયાનો કોન્ટ્રાક્ટ આપવામાં આવ્યો હતો. અગાઉ 1997માં ગુલશન કુમારની પણ સોપારી આપીને હત્યા કરવામાં આવી હતી.

ઘણીવાર સાંભળ્યું હશે કે કોઈની હત્યા કરાવવા માટે 'સોપારી' આપવામાં આવે છે, પરંતુ શું જાણો છો કે આ ગુના સાથે 'સોપારી' શબ્દ કેવી રીતે જોડાયો?  આ નામ જેટલું વિચિત્ર લાગે છે પણ તેની વાત એટલી જ રસપ્રદ છે.

સોપારીનો ઈતિહાસ શું છે?

સોપારી શબ્દ મૂળરૂપે પાન સાથે ખાવામાં આવતી સોપારી માટે વપરાય છે. તે એક પ્રકારનો નશો છે અને તેનો ઉપયોગ મોંને ફ્રેશ કરવા માટે કરવામાં આવતો હતો.

સોપારી શબ્દ ગુનાની દુનિયા સાથે કેવી રીતે સંબંધિત છે?

લેખક અને પત્રકાર હુસૈન ઝૈદીના પુસ્તક ‘ડોંગરી ટુ દુબઈ’માં કહેવામાં આવ્યું છે કે સોપારી શબ્દ મુંબઈમાં માહિમ પ્રાંતના રાજા ભીમ પરથી આવ્યો છે. ભીમ માહેમી આદિવાસી સમુદાયના વડા હતા, જે મુંબઈમાં માહિમ પ્રાંતના રાજા પણ હતા. તેમના જનજાતિમાં એક રસપ્રદ પરંપરા હતી. તે પોતાની સભામાં કેટલાક લોકોને આમંત્રિત કરતા હતા અને યોદ્ધાઓને ત્યાં ભોજન કરાવવામાં આવતું હતું. પછી સભાની વચ્ચે પાન અને સોપારી રાખવામાં આવતી હતી, જ્યારે કોઈ યોદ્ધા સોપારી ઉપાડી લેતો ત્યારે તેને તે મુશ્કેલ કાર્ય સોંપવામાં આવતું હતું.

સોપારી અને ગુના વચ્ચેનું જોડાણ કેવી રીતે અસ્તિત્વમાં આવ્યું તે વિશે ઘણી વાર્તાઓ પ્રચલિત છે. કેટલાક લોકોનું માનવું છે કે જૂના જમાનામાં જ્યારે લોકો કોઈને ગુના માટે નોકરી પર રાખતા હતા ત્યારે તેમને સોપારી આપવામાં આવતી હતી. આ સોપારી એક પ્રકારનું ટોકન હતું જે બતાવે છે કે કામ પૂર્ણ થયું છે. બીજી એક વાર્તા મુજબ સોપારી આપવાની પ્રથા ગુજરાતમાંથી શરૂ થઈ. અહીંના ગુનેગારોમાં સોપારી આપવી એ સામાન્ય બાબત હતી. જ્યારે ગુનો આચરવામાં આવતો ત્યારે ગુનેગારને સોપારી આપવામાં આવતી અને તેના બદલામાં તે ગુનો આચરતો.

અંડરવર્લ્ડમાં સોપારીનું મહત્વ

સોપારીને અંડરવર્લ્ડમાં સોદાનું પ્રતીક પણ માનવામાં આવે છે. જ્યારે કોઈ વ્યક્તિ કોઈને મારવા માટે રાખે છે, ત્યારે તે એક પ્રકારનો સોદો કરે છે અને સોપારી આ સોદાનું પ્રતીક છે. આ સિવાય સોપારીને ગુપ્ત સંદેશો આપવાનો પણ એક માર્ગ માનવામાં આવતો હતો. ગુનેગારો સોપારી દ્વારા એકબીજાને મેસેજ કરતા હતા. આજકાલ કોન્ટ્રાક્ટ કિલિંગ માટે સોપારી શબ્દ વપરાય છે.