સુપ્રીમ કોર્ટે બુધવારે ખેડૂતોના આંદોલન પર સુનાવણી કરી. કોર્ટે કહ્યું કે કોર્ટના દરવાજા ખેડૂતો માટે હંમેશા ખુલ્લા છે. તેઓ તેમના સૂચનો અથવા માંગણીઓ સાથે સીધા અમારી પાસે આવી શકે છે અથવા તેમના પ્રતિનિધિ મોકલી શકે છે. સુપ્રિમ કોર્ટે ખનૌરી બોર્ડર પર આમરણાંત ઉપવાસ કરી રહેલા ખેડૂત નેતા જગજીત સિંહ દલ્લેવાલના સ્વાસ્થ્ય અંગે પંજાબ સરકાર પાસેથી જવાબ પણ માંગ્યો છે.

સુપ્રીમ કોર્ટે પોતાના આદેશમાં કહ્યું હતું કે, "જો દલ્લેવાલને કંઇક થાય છે અને આક્ષેપો કરવામાં આવે છે તો તે રાજ્ય સરકાર માટે સારું રહેશે નહીં. રાજ્ય સરકારે તેને તમામ તબીબી સુવિધાઓ મળે તે સુનિશ્ચિત કરવું જોઈએ." આ દરમિયાન પંજાબના એટર્ની જનરલ ગુરમિન્દર સિંહે દલ્લેવાલ સાથે વાત કરી છે. ગુરમિન્દર સિંહે કહ્યું, "તેમણે મેડિકલ ટેસ્ટ કરાવવાની ના પાડી દીધી છે. તેના તમામ મહત્વપૂર્ણ અંગો યોગ્ય રીતે કામ કરી રહ્યાં છે."