રાજકોટ મહાપાલિકામાં કેલેન્ડર વર્ષ 2024 દરમિયાન નળ, ગટર, રસ્તા, લાઇટ, સફાઇ, પાણી, ગેરકાયદે બાંધકામો સહિતના કુલ વિવિધ 30 પ્રકારની 4,26,418 ફરિયાદો નોંધાઇ છે. વર્ષ-2023માં કુલ 3,82,448 ફરિયાદો નોંધાઇ હતી. 2023ની તુલનાએ 2024માં 43870 ફરિયાદો વધુ નોંધાઇ છે જે આંચકાજનક છે, ફરિયાદોના પ્રમાણમાં જબરો વધારો થયો છે. તમામ પ્રકારની ફરિયાદોમાં સૌથી વધુ ફરિયાદો ડ્રેનેજને લગતી છે, ડ્રેનેજની કુલ 2,53,213 ફરિયાદો નોંધાઇ છે જે કુલ ફરિયાદોના 59.39 ટકા છે. જ્યારે બીજા ક્રમે સ્ટ્રીટ લાઇટ્સની 54286 ફરિયાદો નોંધાઇ છે. સ્વચ્છતા મિશનની ગુલબાંગો વચ્ચે ગંદકીની 43,133 ફરિયાદો નોંધાઇ છે. એકંદરે ફરિયાદોનું પ્રમાણ વધવા મામલે રાજકોટના નવનિયુક્ત મ્યુનિસિપલ કમિશનર તુષાર સુમેરાએ રિવ્યુ કરવો જરૂરી છે.
બીજીબાજુ રાજકોટ શહેરમાં ટીઆરપી ગેમઝોન અગ્નિકાંડ, સાગઠિયાકાંડ, ફાયર બ્રિગેડમાં એસીબીની ટ્રેપ સહિતના ઘટનાક્રમ બાદ ટાઉન પ્લાનિંગ બ્રાન્ચને લગતી ફરિયાદોનું પ્રમાણ ઘટીને તળિયે પહોંચ્યું છે, વર્ષના 365 દિવસમાં ટાઉન પ્લાનિંગ બ્રાન્ચને લગતી ગેરકાયદે બાંધકામો વિગેરે સહિતની ફક્ત 2184 ફરિયાદો નોંધાઇ છે જે કુલ ફરિયાદોના 0.51 ટકા છે. જ્યારે ફાયર બ્રિગેડને લગતી તો ફક્ત 213 ફરિયાદો નોંધાઇ છે જે કુલ ફરિયાદોના ફક્ત 0.05 ટકા છે.

ક્યા વિભાગની કેટલી ફરિયાદો નોંધાઇ
ફરિયાદ પ્રકાર    સંખ્યા
રખડુ ઢોર કૂતરા    845
આવાસ યોજના    967
જાહેર બાંધકામ     14,274
સિટી બસ સેવા     2221
મૃત પશુ નિકાલ     7508
દબાણ હટાવ     6602
ડ્રેનેજ ચોક અપ-ઓવરફ્લો     2,34,298
ડ્રેનેજ મેન્ટેનન્સ     18,915
ચૂંટણી શાખા     02
ઇલેક્ટ્રોનિક વેસ્ટ     61
હોર્ડિંગ-એસ્ટેટ બ્રાન્ચ     123
ફાયર બ્રિગેડ     213
ભેળસેળ-ફૂડ બ્રાન્ચ     241
બાગ બગીચા     4538
ડંકી રિપેરિંગ     810
આરોગ્ય કેન્દ્રો     1348
ઓનલાઇન પેમેન્ટમાં મુશ્કેલી     1348
અન્ય વિવિધ ફરિયાદ     19
પાર્કિંગ સમસ્યા     136
સ્ટ્રીટ લાઇટ્સ     54,286
વોંકળા સફાઇ     1025
ગંદકી     43,133
રમત ગમત સંકુલો     250
ટેક્સ બ્રાન્ચ     476
ટીપી બ્રાન્ચ     2184
ટ્રાફિક અને ટ્રાન્સપોર્ટ સેલ     365
અર્બન મેલેરિયા     3495
પાણી વિતરણ     27,718
પ્રદ્યુમન પાર્ક ઝૂ     03
કુલ ફરિયાદો     4,26,418
ઉકેલાયેલી ફરિયાદો     4,23,626
પેન્ડિંગ ફરિયાદો     2792