શહેરમાં સિટીબસના ચાલકો બેફામ બની બસ હંકારતા હોવાથી અનેક વખતે જીવલેણ અકસ્માત સર્જાયા છે એમ છતાં તંત્ર દ્વારા ડ્રાઈવરો સામે દાખલારૂપ કાર્યવાહી કરવામાં ન આવતા અકસ્માતો વધી રહ્યા છે. બે દિવસમાં સીટી બસના ચાલકે બે અકસ્માત સર્જ્યા છે. માધાપર ચોકડી નજીક રાહદારી વૃધ્ધને ઉલાળતા પટકાયેલા વૃધ્ધના પગ ઉપર બસનું તોતિંગ વ્હીલ ફરી વળતા ગંભીર ઇજાઓ થવાથી હોસ્પિટલમાં ખસેડવામાં આવ્યા છે જયારે બીજા અકસ્માતમાં કુવાડવા રોડ પર જતી વેગેનઆર કારને પાછળથી ઠોકર મારતા કારમાં મોટું નુકશાન થયું હતું.

ગઈકાલે માધાપર ચોકડી નજીક પુરપાટ ઝડપે આવતી બીઆરટીએસ બસએ મહેન્દ્રભાઈ મણિલાલ ગાંધી (ઉ.વ.63) નામના વૃધ્ધને ઠોકરે લેતા રોડ પર ફંગોળાયા હતા અને બસનું વ્હીલ પગ ઉપર ફરી વળતા પગ ચકદાવાથી લોહી લુહાણ થયા હતા બનાવના પગલે લોકોના ટોળા એકઠા થયા હતા અને બસ પર પથ્થર મારો કરી કાચ ફોડ્યા હતા. લોકોનો રોષ જોઈ બસ ચાલક ઉતરી રિક્ષામાં બેસી પલાયન થઇ ગયો હતો. જો કે ત્યાં હાજર જાગૃત નાગરિકોએ વિડીયો બનાવી સોશિયલ મીડિયામાં વહેતો કર્યો હતો. બનાવના પગલે કોઈએ 108નેજાણ કરતા વૃધ્ધને તાકીદે ખાનગી હોસ્પિટલમાં ખસેડવામાં આવ્યા હતા. બનાવના પગલે આરએમસીમાં ડે.ચીફ એકાઉન્ટન્ટ તરીકે ફરજ બજાવતા ભોગબનનારના પુત્ર અભિલાષભાઈ મહેન્દ્રભાઈ ગાંધીની ફરિયાદ પરથી પોલીસે બસ ચાલક સામે ગુનો નોંધી ઝડપી લેવા તજવીજ હાથ ધરી છે.

જયારે બીજા બનાવમાં રૈયાનાકા ટાવર અંદર દેવ કુંવરબા સ્કૂલ પાસે રહેતા વિશાલભાઈ રાજેશભાઈ શીંગાળા (ઉ.વ.35) નામના વેપારી યુવક આજરોજ સવારે પોતાની જીજે 03 ડીજી 5544 નંબરની વેગેનઆર કારમાં પરિવાર સાથે બહારગામ જતા હતા ત્યારે કોઠારીયા રોડ પર પહોંચતા પાછળથી આવતી જીજે 03 બીઝેડ 2168 નંબરના સીટી બસના ચાલકે બસ પુરપાટ ઝડપે હંકારી પાછળથી ઠોકર મારતા કારનો પાછળનો કાચ ફૂટી ગયો હતો, ડેકીના દરવાજામાં ખોબો પડી ગયો હતો. બ્રેક લાઈટ સહીતનો ભાગ તૂટી ગયો હતો. કુલ રૂ.30,000 જેટલું નુકસાન થયું હતું. કારની નુકશાનીનો ખર્ચ આપવાનું ડ્રાઈવરને કહેતાઆપવાની ના પાડતા યુવકએ 100 નંબરમાં પોલીસને ફોન કરી બોલાવતા પોલીસ આવી ગઈ હતી અને બસ ડ્રાઈવરને બસ લઈને આવવાનું કહેતા આજીડેમ પોલીસએ લવાઈ હતી. પોલીસે બસના ચાલક પ્રદીપ રાવતભાઈ લોખીલ (રહે-શુભમ સ્કૂલ સામે, નીલકંઠ ટોકીઝ સામે) વિરુધ્ધ ગુનો નોંધી આગળની કાર્યવાહી હાથ ધરી છે.