ઈન્દિરા ગાંધી ઈન્ટરનેશનલ (IGI) એરપોર્ટના ટર્મિનલ 2 પર CISFના જવાને CPR આપીને એક મુસાફરનો જીવ બચાવ્યો હતો. પેસેન્જરને અચાનક છાતીમાં દુખાવો થયો અને તે જમીન પર બેભાન થઈ ગયો.

CPR આપ્યા બાદ મુસાફર ભાનમાં આવ્યો. મુસાફરને તાત્કાલિક સફદરજંગ હોસ્પિટલમાં દાખલ કરવામાં આવ્યો હતો. આ ઘટના બાદ લોકો CISFના જવાનો દ્વારા કરવામાં આવેલા તુરંત કામની પ્રશંસા કરી રહ્યા છે.

CISF અધિકારીના જણાવ્યા અનુસાર, અરશિદ અયુબ નામનો મુસાફર 20 ઓગસ્ટે સવારે 10.50 વાગ્યે ટર્મિનલ 2 પર પહોંચ્યો હતો. અહીંથી તેણે ઈન્ડિગોની ફ્લાઈટ નંબર 6E 2747 દ્વારા શ્રીનગર જવાનું હતું. અચાનક તેને ફોરકોર્ટ એરિયામાં તેની છાતીમાં ભારે દુખાવો થયો અને તે બેભાન થઈ ગયો અને જમીન પર પડ્યો. આ જોઈને એરપોર્ટના એરાઈવલ ગેટ પર તૈનાત CISF QRTના જવાનોએ તરત જ તેને CPR આપ્યો.

સીપીઆર પછી તરત જ પેસેન્જરની સ્થિતિમાં સુધારો જોવા મળ્યો. આ પછી ટર્મિનલ 2 ના મેડિકલ રૂમમાં હાજર મેદાંતા હોસ્પિટલના ડૉક્ટર્સ ઘટનાસ્થળે પહોંચ્યા અને પેસેન્જરને મેદાંતા મેડિકેશન રૂમમાં લઈ ગયા અને જ્યાં તેને પ્રાથમિક સારવાર આપવામાં આવી. ત્યારબાદ મુસાફરને વધુ સારવાર માટે સફદરજંગ હોસ્પિટલમાં મોકલવામાં આવ્યો હતો.

ડોક્ટરોએ CISF જવાનની પ્રશંસા કરી

બીજી તરફ  સફદરજંગ હોસ્પિટલના ડોકટરોએ CISF જવાનો દ્વારા દર્શાવવામાં આવેલા ઝડપી પ્રતિભાવની પ્રશંસા કરી હતી. તેમણે કહ્યું કે CPRની મદદથી જ  મુસાફરની સ્થિતિને સ્થિર કરી શકાય એમ હતું.

આ પહેલા પણ સમયાંતરે CISFના જવાનોએ એરપોર્ટ પર CPR આપીને મુસાફરોના જીવ બચાવ્યા છે. થોડા દિવસો પહેલા IGI એરપોર્ટ પર એક મહિલા ડોક્ટરે પણ CPR આપીને એક મુસાફરનો જીવ બચાવ્યો હતો. આ ઘટનાની સોશિયલ મીડિયા પર ખૂબ ચર્ચા થઈ હતી.