રાજકોટના જેતપુરમાં સેન્ટ ફ્રાન્સિસ ગ્રાન્ટ એઇડ સ્કૂલમાં ફાધરે વિદ્યાર્થીને ઢીબી નાખ્યાના સીસીટીવી સામે આવ્યા છે. સીસીટીવીમાં જોઈ શકાય છે કે, ફાધર વિદ્યાર્થીને 8 સેકન્ડમાં 7 લાફા ઝીંકી દે છે. ઉલ્લેખનીય છે કે, આ ઘટના એક અઠવાડિયા પહેલાની છે. પરંતુ સીસીટીવી સામે આવતા રાજકોટ ડીઇઓએ તપાસ હાથ ધરી છે. ​​​​​​​

તપાસ બાદ કાર્યવાહી કરવામાં આવશે
વિદ્યાર્થીને વાલી દ્વારા કોઈપણ પ્રકારની પોલીસ ફરિયાદ કરવામાં આવી નથી કે જિલ્લા શિક્ષણ અધિકારીને પણ કોઈ જ ફરિયાદ મળી નથી. પરંતુ વિદ્યાર્થીને બેફામ મારવામાં આવતો હોવાના સીસીટીવી રાજકોટ જિલ્લા શિક્ષણ અધિકારી સુધી પહોંચતા તેમના દ્વારા તપાસના આદેશ આપવામાં આવ્યા છે. જે બાદ આગળની કાર્યવાહી કરવામાં આવશે. 

આ વિદ્યાર્થી કોણ હતો? તે તપાસનો વિષય
આ અંગે રાજકોટના ઇન્ચાર્જ જિલ્લા શિક્ષણ અધિકારીએ જણાવ્યું છે કે, જેતપુરની સેન્ટ ફ્રાન્સિસ ગ્રાન્ટેડ સ્કૂલમાં ફાધર દ્વારા કોઈ વિદ્યાર્થીને માર મારવામાં આવતો હોવાના સીસીટીવી મને મીડિયાના માધ્યમથી મળ્યા છે. જેથી આ ઘટના અંગે એજ્યુકેશન ઇન્સ્પેક્ટરને તપાસ આપવામાં આવી છે. જોકે આ ઘટના એક અઠવાડિયા પહેલાંની એટલે કે 16 જાન્યુઆરીની હોવાનું જાણવા મળ્યું છે. આ વિદ્યાર્થી કોણ હતો? ક્યાં ધોરણમાં અભ્યાસ કરતા હતો? અને ફાધર દ્વારા શા માટે માર મારવામાં આવ્યો તે અંગે તપાસ બાદ જ ખ્યાલ આવશે. જોકે એક અઠવાડિયા બાદ પણ આ ઘટનામાં હજુ સુધી મને વાલીની ફરિયાદ મળી નથી.