દેશના બીજા સૌથી ધનિક ઉદ્યોગપતિ ગૌતમ અદાણીના અદાણી ગ્રુપ માટે રાહતના સમાચાર છે. કોમ્પિટિશન કમિશન ઓફ ઈન્ડિયા (સીસીઆઈ) એ અદાણી ગ્રુપની સિમેન્ટ કંપની અંબુજા સિમેન્ટ્સના સીકે બિરલા ગ્રુપની ઓરિએન્ટ સિમેન્ટ લિમિટેડમાં 8,100 કરોડ રૂપિયામાં બહુમતી હિસ્સો ખરીદવાના પ્રસ્તાવને મંજૂરી આપી દીધી છે.

સીસીઆઈ એ એક નિવેદનમાં જણાવ્યું હતું કે પ્રસ્તાવિત વ્યવહારમાં ઓરિએન્ટ સિમેન્ટની જારી કરાયેલ શેર મૂડીના 46.80 ટકા હસ્તગત કરનાર (અંબુજા સિમેન્ટ્સ) દ્વારા સંપાદનનો સમાવેશ થાય છે. સ્પર્ધા પંચે જણાવ્યું હતું કે શેરના સંપાદન પછી અંબુજા સિમેન્ટ્સને ઓરિએન્ટ સિમેન્ટની વિસ્તૃત શેર મૂડીના 26 ટકા સુધી હસ્તગત કરવા માટે ઓપન ઓફર કરવાની જરૂર છે. આ ઓપન ઓફર પછી ઓરિએન્ટ સિમેન્ટમાં અંબુજા સિમેન્ટ્સનો હિસ્સો વધીને 72.8 ટકા થશે. સ્પર્ધા પંચે જણાવ્યું હતું કે સીસીઆઈએ અંબુજા સિમેન્ટ્સ લિમિટેડ દ્વારા ઓરિએન્ટ સિમેન્ટ લિમિટેડમાં 72.8 ટકા સુધીના હિસ્સાના પ્રસ્તાવિત સંપાદનને મંજૂરી આપી છે.

અદાણી ગ્રુપની કંપની અંબુજા સિમેન્ટ્સ દેશભરમાં 10 બલ્ક સિમેન્ટ ટર્મિનલ અને 21 ગ્રાઇન્ડીંગ યુનિટ સાથે 22 ઇન્ટિગ્રેટેડ સિમેન્ટ પ્લાન્ટ ચલાવે છે. ઓરિએન્ટ સિમેન્ટના તેલંગાણા, કર્ણાટક અને મહારાષ્ટ્રમાં ત્રણ ઉત્પાદન પ્લાન્ટ છે. ગયા વર્ષે ઓક્ટોબરમાં, અદાણી ગ્રુપે ઓરિએન્ટ સિમેન્ટના સંપાદનની જાહેરાત કરી હતી, જેનાથી તેનું વર્ચસ્વ રૂ. 8,100 કરોડ સુધી વિસ્તર્યું હતું. આ સંપાદન માટે અંબુજા સિમેન્ટ 8100 કરોડ રૂપિયા ખર્ચ કરશે. કંપની આ ખરીદી તેની પાસે ઉપલબ્ધ ભંડોળ દ્વારા પૂર્ણ કરશે. આ સંપાદન પછી અદાણી સિમેન્ટની કુલ કાર્યકારી ક્ષમતા વાર્ષિક 97.4 એમટીપીએ ટન થશે અને માર્ચ 2025 સુધીમાં, કંપની તેની ઉત્પાદન ક્ષમતા વધારીને 100 મિલિયન કરવા જઈ રહી છે.

સ્ટોક એક્સચેન્જ સાથેની રેગ્યુલેટરી ફાઇલિંગમાં અંબુજા સિમેન્ટે જણાવ્યું હતું કે ઓરિએન્ટ સિમેન્ટના સંપાદનથી અંબુજા સિમેન્ટને દક્ષિણ અને પશ્ચિમ ભારતમાં તેની ઉત્પાદન ક્ષમતા વાર્ષિક 8.5 મિલિયન ટન સુધી વધારવામાં મદદ મળશે. ઉપરાંત, અદાણી સિમેન્ટનો બજાર હિસ્સો 2 ટકા વધશે. ઓરિએન્ટ સિમેન્ટના સંપાદન પછી, અંબુજા સિમેન્ટની વાર્ષિક ક્ષમતા 2025 સુધીમાં 100 મિલિયન ટન સુધી પહોંચી જશે. કંપનીએ 2028 સુધીમાં તેને વધારીને 140 મિલિયન ટન કરવાનો લક્ષ્યાંક નક્કી કર્યો છે. અગાઉ, અદાણી ગ્રુપે પણ સાંઘી સિમેન્ટ લિમિટેડ અને પેન્ના સિમેન્ટ ખરીદવાની જાહેરાત કરી હતી.