61 વર્ષીય જોસેફાઈન મોરિસે સ્નેર્સબ્રુક ક્રાઉન કોર્ટમાં કબૂલાત કરી હતી કે તેણીએ છેતરપિંડી કરીને 13 અલગ અલગ પુરુષો અને સ્ત્રીઓ માટે લાઈફ ઇન ધ યુકે ટેસ્ટ આપી હતી. ગૃહ મંત્રાલયે જણાવ્યું હતું કે મહિલાએ જૂન 2022 અને ઓગસ્ટ 2023 વચ્ચે વાસ્તવિક અરજદારો જેવા દેખાવા અને તેમના વતી પરીક્ષામાં હાજર રહેવા માટે વિવિધ વિગ અને અન્ય વેશ ધારણ કર્યા હતા. જેમાં લિંગ પરિવર્તનનો પણ સમાવેશ થાય છે.

હોમ ઓફિસના ઇમિગ્રેશન અધિકારી ફિલિપ પારએ જણાવ્યું હતું કે, મહિલાએ તપાસથી બચવા માટે પૂર્વ-આયોજિત યોજના ઘડી હોવાનું માનવામાં આવે છે, તેણે વેશપલટો કરીને અને અધિકારીઓથી બચવા માટે દેશભરમાં પરીક્ષણ કેન્દ્રોના સ્થાનો કાળજીપૂર્વક પસંદ કર્યા હતા. આ પ્રકારના ગુનાઓ કરતા ઘણા ગુનેગારોની જેમ, અમે માનીએ છીએ કે તેનો હેતુ પૈસા કમાવવાનો હતો.

બ્રિટિશ ઇતિહાસ, મૂલ્યો અને સમાજની સમજ માપતી 24 પ્રશ્નોની પરીક્ષા, કાયમી નિવાસ અથવા નાગરિકતા મેળવવા માટે પાસ કરવી આવશ્યક છે. જો વ્યક્તિ આ પરીક્ષામાં પાસ ન થાય, તો બ્રિટિશ નાગરિકતા મેળવવી ખૂબ જ મુશ્કેલ બની જાય છે. જેના કારણે સ્થળાંતર કરનારા લોકો તેને પસાર કરવા માટે ગેરકાયદેસર પદ્ધતિઓ પણ અપનાવે છે.

હાલમાં યુકેની બ્રોન્ઝફિલ્ડ જેલમાં બંધ મોરિસ વર્ચ્યુઅલી કોર્ટની સુનાવણીમાં હાજર રહ્યા હતા. જેમાં મોરિસે સ્વીકાર્યું કે તેણે અન્ય લોકો સાથે મળીને છેતરપિંડીનું કાવતરું ઘડ્યું હતું અને બે લોકોના કામચલાઉ ડ્રાઇવિંગ લાઇસન્સ ધરાવતી હોવાની કબૂલાત કરી હતી. હવે તેને આ કેસમાં 20 મેના રોજ સજા સંભળાવવામાં આવશે.