પોરબંદરના બોખીરા  વિસ્તારમાં ગરીબો માટે બનાવાયેલ આવાસ યોજનામાં વધુ એક વખત છતમાંથી ધડાકાભેર પોપડા ખરતા નાશભાગ થઇ હતી. આ પ્રકારની પરિસ્થિતિ વારંવાર ઉભી થઇ રહી છે છતા પોરબંદર નગરપાલિકાનું તંત્ર સમારકામ કરાવતુ નથી તેથી કોઇનો જીવ જાય તેની તંત્ર રાહ જોતુ હોય તેવો ઘાટ  ઘડાઇ રહ્યો છે તેથી પોરબંદર નગરપાલિકાની આ નીતિ સામે લોકઆક્રોશ વધવા પામ્યો છે.પોરબંદર શહેરમાં  મિશન સીટી યોજના હેઠળ ગરીબો માટેની આવાસ યોજનાનું નિર્માણ બોખીરા વિસ્તારમાં કરવામાં આવ્યુ છે. આવાસ નિર્માણની શ‚આતથી જ તેની ગુણવત્તા પર સવાલો ઉઠયા હતા અને આ મામલે કોંગ્રેસ દ્વારા ગંભીર આક્ષેપ પણ કરાયા હતા. ૨૪૪૮ ફલેટમાં ગરીબ અને જ‚રિયાતમંદ પરિવારો વસવાટ કરી રહ્યા છે. તેનું બાંધકામ ખૂબજ નબળુ થયુ હોવાના કારણે અનેક વખત છતના પોપડા ખરવાના બનાવ બન્યા છે ત્યારે  આવાસ યોજનામાં ૪૮ નંબરના બ્લોકમાં  ફલેટની લોબીની છતના  પોપડા ખરતા નાસભાગ મચી હતી. સદભાગ્યે કોઇને ઇજા કે જાનહાની થઇ ન હતી. મોટા ભાગના ફલેટ જર્જરિત હોવાથી લોકો જીવના જોખમે વસવાટ કરી રહ્યા છે. દીવાલોમાં અને છતમાં ઠેર ઠેર તિરાડો જોવા મળે છે અનેક સ્થળોએ પાઇપલાઇન અને પાણીના ટાંકા પણ લીકેજ છે. જેના લીધે થોડા સમય પૂર્વે જ એક પંખો સળગ્યો હતો. વારંવાર અકસ્માત સર્જાવા છતા પાલિકા તંત્ર દ્વારા કોઇ કાર્યવાહી થતી નથી. આથી સ્થાનિકોએ એવો સવાલ કર્યો છે કે કોઇનુ મોત થશે કે મોટો અકસ્માતથશે ત્યારબાદ જ પાલિકાની ઉંભ ઉડશે કે કેમ? પાલિકા તંત્રએ આળસ ત્યજી વહેલીતકે સર્વે હાથ ધરી સમારકામ કરવુ જોઇએ તેવી માંગ ઉઠી છે.