અંકલેશ્વર જીઆઇડીસીમાં આવેલી ડેટોક્સ ઇન્ડિયા કંપનીમાં આજે બપોરના સમયે બ્લાસ્ટની ઘટના બનતાં દોડધામ મચી ગઈ હતી. પ્રચંડ ધડાકા સાથે બ્લાસ્ટ થતાં નજીકમાં કામ કરી રહેલા ચાર કામદારનાં મોત નીપજ્યાં હોવાની પ્રાથમિક માહિતી મળી રહી છે. કંપનીના એમ.ઇ. પ્લાન્ટમાં સ્ટીમ પ્રેશર પાઇપ ફાટતાં બ્લાસ્ટ થયો હોવાનું અનુમાન લગાવાયું છે. અંકલેશ્વર GIDCમાં આવેલી ડેટોક્સ ઇન્ડિયા કંપની ઈન્ડસ્ટ્રીયલ વેસ્ટના નિકાલનું કામ કરે છે.

મૃતકોના નામ

પોલેશરામ (ઉં.વ.33, હાલ.સારંગપુર-અંકલેશ્વર, મૂળ.યુ.પી), મુકેશસિંગ (ઉં.વ.33, બિહાર), હરીનાથ યાદવ (યુ.પી) અને અશોક રામકૃષ્ણ (યુ.પી)નો સમાવેશ થાય છે.

એકની લાશ પ્લાન્ટની બહાર કેમ્પસમાં પડી
જે કંપનીના પ્લાન્ટમાં ફિડ ટેન્ક પર રેલીંગ લગાવવાની કામગીરી ચાલી રહી હતી. જેમાં રેલીંગ માટે કામદારો વેલ્ડિંગ કરી રહ્યા હતા તે દરમિયાન અચાનક બ્લાસ્ટ થયો હતો. આ દુર્ઘટનામાં ચાર કામદારોના મોત અને 4 કામદારો ઈજાગ્રસ્ત થયા છે. બ્લાસ્ટ એટલો પ્રચંડ હતો કે એકની લાશ પ્લાન્ટની બહાર ઉડીને કંપનીના કેમ્પસમાં પડી હતી.

ફાયર સેફ્ટી એન્ડ હેલ્થ અને પોલીસ કાફલો ઘટનાસ્થળે
બનાવની જાણ થતાંની સાથે જ ફાયર ફાઇટરો તેમજ સેફ્ટી એન્ડ હેલ્થ વિભાગની ટીમ ઘટનાસ્થળે પહોંચી છે. આ તરફ પોલીસ કાફલો પણ ઘટનાસ્થળે પહોંચ્યો છે. બ્લાસ્ટની માહિતી મળતાં જ લોકોનાં ટોળાં પણ કંપની બહાર એકઠાં થઈ ગયાં છે.