ભાવનગર જિલ્લાના વલ્લભીપુર નજીક અકસ્માતની ઘટના બની હતી. કાર ચાલકે ટલ્લો મારતા બાઈક સવાર યુવાનોને ગંભીર ઇજા પહોંચતા હોસ્પિટલ.ખસેડાયા હતા. જ્યારે એકનું મોત નીપજ્યું હતું. વલ્લભીપુર તાલુકાના લુણધરા ગામના ત્રણ યુવાનો બાઈક ઉપર ચમારડીથી પોતાના ગામ આવી રહ્યા હતા. ત્યારે લીંમડા નજીક કાર ચાલકે બાઈકને ટલ્લો મારી અકસ્માત સર્જતા એક યુવાનનું મોત નિપજવા પામ્યું હતું. જ્યારે બે ઈજાગ્રસ્ત યુવકોને ખાનગી હોસ્પિટલ અને અમદાવાદ સારવારમાં ખસેડવામાં આવ્યા હતા. ઉક્ત બનાવના પગલે ભારે અરેરાટી છવાઈ જવા પામી હતી. જ્યારે કાર ચાલક અકસ્માત સર્જી નાસી છુટ્યો હતો.

આ બનાવની જાણવા મળતી વિગતો અનુસાર વલ્લભીપુર તાલુકાના લુણધરા ગામે રહેતા સતીષભાઈ અશોકભાઈ ચૌહાણ (ઉ.વ. ૨૧), સંદિપભાઈ સુરેશભાઈ ચૌહાણ (ઉ.વ. ૧૭) અને પરેશભાઈ હરેશભાઈ ચૌહાણ (ઉ.વ. ૨૧) ત્રણેય બાઈક ઉપર ચમારડી ગામેથી પોતાના ગામ લુણઘરા આવી રહ્યા હતા. તે વેળાએ સાંજના ૫.૩૦ કલાકના લીંમડા ગામ પાસે પહોંચતા પાછળના ભાગેથી કારના ચાલકે બાઈકને ટલ્લો મારી અકસ્માત સર્જતા ત્રણેય યુવાનને ગંભીર ઈજા પહોંચતા તાત્કાલીક સારવાર અર્થે ભાવનગર સર.ટી. હોસ્પિટલ ખસેડવામાં આવ્યા હતા. ટુંકી દરમિયા સતીષભાઈ ચૌહાણનું મોત નિપજવા પામ્યુ હતું. જ્યારે અન્ય ઈજાગ્રસ્ત સંદિપભાઈને ખાનગી હોસ્પિટલ અને પરેશભાઈ ચૌહાણને વધુ સારવાર અર્થે અમદાવાદ ખસેડવામાં આવ્યા હતા. અકસ્માતના બનાવને મામલે સર ટી હોસ્પિટલ પોલીસ ચોકી દ્વારા મૃતકના મૃતદેહને પીએમ અર્થે ખસેડી જરૂરી કેસ કાગળો વલ્લભીપુર મોકલાવી આપી વધુ કાર્યવાહી હાથ ધરી હતી.