છત્તીસગઢના બીજાપુર જિલ્લામાં સુરક્ષા દળોએ ગુરુવારે એક મોટા ઓપરેશનમાં 12 નક્સલવાદીઓને ઠાર કર્યા છે. દક્ષિણ બીજાપુરના જંગલોમાં સવારે 9 વાગ્યાની આસપાસ સુરક્ષા દળો અને નક્સલવાદીઓ વચ્ચે ભીષણ અથડામણ શરૂ થઈ હતી, જે મોડી સાંજ સુધી ચાલી હતી.

એક વરિષ્ઠ પોલીસ અધિકારીએ જણાવ્યું હતું કે સુરક્ષા કર્મચારીઓની એક સંયુક્ત ટીમ નક્સલ વિરોધી કામગીરી પર હતી ત્યારે આ અથડામણ થઈ હતી. પ્રાથમિક માહિતી અનુસાર એન્કાઉન્ટરમાં 12 નક્સલવાદીઓ માર્યા ગયા છે. આ વિસ્તારમાં હજુ પણ સર્ચ ઓપરેશન ચાલુ હોવાથી વધુ માહિતીની રાહ જોવાઈ રહી છે.

આ મહિનામાં અત્યાર સુધીમાં 26 નક્સલવાદીઓ ઠાર:

પોલીસ અધિકારીએ વધુમાં જણાવ્યું હતું કે આ ઓપરેશનમાં સુરક્ષા દળોને કોઈ નુકસાન થયું નથી. આ સાથે જ આ મહિનામાં અત્યાર સુધીમાં રાજ્યમાં અલગ-અલગ એન્કાઉન્ટરમાં કુલ 26 નક્સલવાદીઓ માર્યા ગયા છે.

ઉલ્લેખનીય છે કે 12 જાન્યુઆરીએ બીજાપુર જિલ્લાના મડેડ પોલીસ સ્ટેશન વિસ્તારમાં સુરક્ષા જવાનો સાથેની અથડામણમાં બે મહિલાઓ સહિત પાંચ નક્સલવાદીઓ માર્યા ગયા હતા.