તાજેતરમાં, આઈપીએલ મેગા ઓક્શનમાં દિલ્હી કેપિટલ્સે કેએલ રાહુલને તેમની ટીમમાં ઉમેરવા માટે મોટી રકમ ખર્ચ કરી. દિલ્હી કેપિટલ્સે કેએલ રાહુલને 14 કરોડ રૂપિયામાં ખરીદ્યો. આ પહેલા દિલ્હી કેપિટલ્સે તેના કેપ્ટન ઋષભ પંતને રિલીઝ કર્યા હતા. જે બાદ એવું માનવામાં આવી રહ્યું હતું કે દિલ્હી કેપિટલ્સ કેએલ રાહુલને પોતાનો કેપ્ટન બનાવશે પરંતુ IPL સીઝન શરૂ થાય તે પહેલા માહિતી બહાર આવી રહી છે કે કેએલ રાહુલ દિલ્હી કેપિટલ્સનો કેપ્ટન નહીં બને. એવું કહેવામાં આવી રહ્યું છે કે કેએલ રાહુલે પોતે કેપ્ટનશીપનો ઇનકાર કરી દીધો છે.

શું અક્ષર પટેલ હવે દિલ્હી કેપિટલ્સનો કેપ્ટન બનશે?

જોકે, હજુ સુધી સતાવાર જાહેરાત નથી થઇ. કેએલ રાહુલે દિલ્હી કેપિટલ્સની કેપ્ટનશીપ કેમ નકારી કાઢી તે અંગે સતત અટકળો ચાલી રહી છે. જોકે, એવું માનવામાં આવે છે કે કેએલ રાહુલ પછી દિલ્હી કેપિટલ્સ ઓલરાઉન્ડર અક્ષર પટેલને કેપ્ટનશીપ સોંપી શકે છે. જોકે, દિલ્હી કેપિટલ્સ કોને પોતાનો કેપ્ટન પસંદ કરે છે તે જોવું રસપ્રદ રહેશે. અગાઉ, વિકેટકીપર બેટ્સમેન ઋષભ પંત દિલ્હી કેપિટલ્સનો કેપ્ટન હતો પરંતુ IPL મેગા ઓક્શન પહેલા દિલ્હી કેપિટલ્સે ઋષભ પંતને રિલીઝ કરી દીધો. લખનૌ સુપર જાયન્ટ્સે IPL મેગા ઓક્શનમાં ઋષભ પંતને ખરીદ્યો છે.

દિલ્હી કેપિટલ્સને પહેલી IPL ટ્રોફીની રાહ

જોકે, દિલ્હી કેપિટલ્સ તેની પહેલી IPL ટ્રોફીની રાહ જોઈ રહ્યું છે. અત્યાર સુધી દિલ્હી કેપિટલ્સ IPLનો ખિતાબ જીતવામાં નિષ્ફળ રહ્યું છે. આ સિઝનમાં દિલ્હી કેપિટલ્સ 24 માર્ચે લખનૌ સુપર જાયન્ટ્સ સામે પહેલી મેચ રમશે. આ પહેલા હેરી બ્રુકે દિલ્હી કેપિટલ્સને મોટો ઝટકો આપ્યો હતો. હેરી બ્રુકે સોશિયલ મીડિયા પર પોસ્ટ કરીને કહ્યું હતું કે તે IPLમાં દિલ્હી કેપિટલ્સ તરફથી નહીં રમે. હેરી બ્રુકે IPLમાં દિલ્હી કેપિટલ્સ કરતાં ઇંગ્લેન્ડની રાષ્ટ્રીય ટીમને પોતાની પસંદગી વ્યક્ત કરી.