અમેરિકાના રાષ્ટ્રપતિ ડોનાલ્ડ ટ્રમ્પે દાવો કર્યો  છે કે બ્રિક્સ પર ૧૫૦ ટકા ટેરિફ લાદવાની ધમકી બાદ, નવ દેશોનું આ જૂથ વિખેરાઈ ગયું છે. ટ્રમ્પે કહ્યું કે અમેરિકન ડોલરને પડકારવાના બ્રિક્સના પ્રયાસોનું કોઈ પરિણામ નહીં આવે. ટ્રમ્પે કહ્યું કે બ્રિક્સ દેશો આપણા ડોલરનો નાશ કરવાનો પ્રયાસ કરી રહ્યા છે. તેઓ એક નવું ચલણ રજૂ કરવા માંગે છે. એટલા માટે જ્યારે હું સત્તામાં આવ્યો, ત્યારે મેં પહેલી વાત એ કહી કે જે પણ બ્રિક્સ દેશ નવી ચલણ વિશે વાત કરશે તેના પર 150 ટકા ટેરિફ લાદવામાં આવશે. તે પછી આ સંગઠન પડી ભાંગ્યું છે.

તેમણે કહ્યું કે મને ખબર નથી કે બ્રિક્સમાં હવે શું થઈ રહ્યું છે. અમે ઘણા સમયથી તેના વિશે કંઈ સાંભળ્યું નથી. ઉલ્લેખનીય છે કે બ્રિક્સમાં બ્રાઝિલ, રશિયા, ભારત, ચીન, દક્ષિણ આફ્રિકા, ઇજિપ્ત, ઇથોપિયા, ઈરાન અને સંયુક્ત આરબ અમીરાતનો સમાવેશ થાય છે. આ સાથે, તુર્કી, અઝરબૈજાન અને મલેશિયાએ બ્રિક્સના સભ્ય બનવા માટે અરજી કરી છે. આ ઉપરાંત, ઘણા અન્ય દેશોએ પણ તેમાં જોડાવાની ઇચ્છા વ્યક્ત કરી છે.


ડોનાલ્ડ ટ્રમ્પે તાજેતરમાં બ્રિક્સ પર જોરદાર નિશાન સાધ્યું હતું. ટ્રમ્પે કહ્યું હતું કે અમેરિકા ઇચ્છે છે કે બ્રિક્સ દેશો સમજી જાય કે તેઓ અમેરિકન ડોલરનું સ્થાન લઈ શકે તેમ નથી. જો આવું થશે, તો બ્રિક્સ દેશો પર ૧૫૦ ટકા ટેરિફ લાદવામાં આવશે.

ટ્રમ્પે સોશિયલ મીડિયા પ્લેટફોર્મ ટ્રુથ સોશિયલ પર પોસ્ટ કરીને કહ્યું હતું કે બ્રિક્સ દેશો યુએસ ડોલરના વર્ચસ્વને પડકારવાનો પ્રયાસ કરી રહ્યા છે અને અમેરિકા ફક્ત દર્શક બનીને જોઈ રહ્યું હતું. પરંતુ આ વ્યૂહરચના હવે કામ કરશે નહીં. અમે ઇચ્છીએ છીએ કે આ દુશ્મન દેશો ન તો નવું બ્રિક્સ ચલણ બનાવે કે ન તો અમેરિકન ડોલરના વર્ચસ્વને પડકારવા માટે અન્ય કોઈ ચલણને ટેકો આપે. જો આમ નહીં થાય તો બ્રિક્સ દેશો પર ૧૫૦ ટકા ટેરિફ લાદવામાં આવશે.

 છેલ્લા કેટલાક સમયથી એ બ્રિક્સ દેશો પોતાનું ચલણ લોન્ચ કરવાની ચર્ચા કરી રહ્યા હતા.   પરંતુ હવે ટ્રમ્પે આ અંગે બ્રિક્સ દેશોને ખુલ્લી ધમકી આપી છે. ટ્રમ્પના વિરોધ બાદ સૌ પ્રથમ ભારતે જ નિવેદન આપ્યું હતું કે તે બ્રિકસ ચલણ લાવવાને ટેકો નહીં આપે.


બ્રિક્સ દેશો નવું ચલણ કેમ ઇચ્છે છે?
નવું ચલણની ઇચ્છા રાખવાના ઘણા કારણો છે. તાજેતરના વૈશ્વિક નાણાકીય પડકારો અને અમેરિકાની આક્રમક વિદેશ નીતિઓને કારણે બ્રિક્સ દેશોમાં એક નવાંસામાન્ય ચલણની જરૂરિયાત ઊભી થઈ છે. બ્રિક્સ દેશો યુએસ ડોલર અને યુરો પર વૈશ્વિક નિર્ભરતા ઘટાડીને આર્થિક હિતો માટે એક નવું  સામાન્ય ચલણ રજૂ કરવા માંગે છે. આ નવાં ચલણની જરૂરિયાત અંગે સૌપ્રથમ ચર્ચા 2022માં 14મા બ્રિક્સ સમિટ દરમિયાન થઈ હતી. તે સમયે, રશિયન રાષ્ટ્રપતિ પુતિને કહ્યું હતું કે બ્રિક્સ દેશો એક નવી વૈશ્વિક અનામત ચલણ રજૂ કરવાની યોજના બનાવી રહ્યા છે. આ પછી, એપ્રિલ 2023 માં, બ્રાઝિલના રાષ્ટ્રપતિ લુઇઝ ઇનાસિયો લુલા દા સિલ્વાએ બ્રિક્સ ચલણના પ્રસ્તાવને ટેકો આપ્યો અને કહ્યું હતું કે બ્રિક્સ બેંક જેવી સંસ્થા બ્રાઝિલ અને ચીન વચ્ચે અથવા બ્રાઝિલ અને અન્ય બ્રિક્સ દેશો વચ્ચે વેપાર કરવા માટે નવું  ચલણ કેમ ન રાખી શકે?


બ્રિક્સ ચલણ યુએસ ડોલર પર કેવી અસર કરશે?
દાયકાઓથી, યુએસ ડોલરનું વિશ્વ પર એકપક્ષીય વર્ચસ્વ રહ્યું છે. યુએસ ફેડરલ રિઝર્વ અનુસાર, ૧૯૯૯ થી ૨૦૧૯ દરમિયાન, યુએસમાં ૯૬ ટકા આંતરરાષ્ટ્રીય વેપાર ડોલરમાં થયો હતો, એશિયા પેસિફિક ક્ષેત્રમાં ૭૪ ટકા ડોલરમાં થયો હતો અને બાકીના વિશ્વમાં ૭૯ ટકા વેપાર યુએસ ડોલરમાં થયો હતો. જોકે, તાજેતરના વર્ષોમાં ડોલરનો અનામત ચલણ હિસ્સો ઘટ્યો છે કારણ કે યુરો અને યેનની લોકપ્રિયતા પણ વધી છે. પરંતુ ડોલર હજુ પણ વૈશ્વિક સ્તરે સૌથી વધુ ઉપયોગમાં લેવાતું ચલણ છે. પરંતુ નિષ્ણાતો માને છે કે જો બ્રિક્સ દેશો વેપાર માટે ડોલરને બદલે નવા બ્રિક્સ ચલણનો ઉપયોગ શરૂ કરે છે, તો તે અમેરિકાની પ્રતિબંધો લાદવાની શક્તિને અસર કરી શકે છે. આનાથી ડોલરનું મૂલ્ય ચોક્કસપણે ઘટશે. શક્ય છે કે તેની અસર અમેરિકામાં સ્થાનિક સ્તરે પણ જોવા મળે. બ્રિક્સના સભ્યો અને અન્ય વિકાસશીલ દેશો કહે છે કે તેઓ વૈશ્વિક નાણાકીય વ્યવસ્થામાં અમેરિકાના વર્ચસ્વથી કંટાળી ગયા છે. બ્રિક્સ દેશો યુએસ ડોલર અને યુરો પર વૈશ્વિક નિર્ભરતા ઘટાડીને તેમના આર્થિક હિતોને વધુ સારી રીતે આગળ વધારવા માંગે છે.