મારી નાખવાની ધમકી

ખંભાળિયા તાલુકાના ભાડથર ગામે રહેતા હર્ષદભાઈ કાલિદાસભાઈ ગોંડલીયા નામના 42 વર્ષના યુવાનના પરિવારની એક સગીરાની આ જ ગામનો સમીર સલીમ સૈયદ નામનો શખ્સ અવારનવાર પીછો કરી અને છેડતી કરતો હતો. આ અંગે હર્ષદભાઈ તેમના અન્ય પરિવારજનોને સાથે રાખી અને ઉપરોક્ત શખ્સને છેડતી નહીં કરવા માટે સમજાવવા જતા આ બાબતનું મન દુઃખ રાખી અને આરોપી સમીર સલીમ સાથે ઇબ્રાહીમ ઉર્ફે ભોલો સલીમ સૈયદ, અજીત ઈબ્રાહીમ સૈયદ અને અમીર સલીમશા ફકીર નામના ચાર શખ્સોએ તેમને બીભત્સ ગાળો કાઢી અને લાકડાના ધોકા તથા રીક્ષાના સાયલેન્સર વડે હુમલો કર્યો હતો.

આમ, આરોપીઓ દ્વારા ફરિયાદી હર્ષદભાઈ તથા તેમની સાથે સાહેદ ધર્મેન્દ્રભાઈ અને પિયુષભાઈ પર હુમલો કરી, ફ્રેક્ચર સહિતની ઇજાઓ પહોંચાડી, જાનથી મારી નાખવાની ધમકી આપવામાં આવી હોવા અંગેની ફરિયાદના આધારે ખંભાળિયા પોલીસે ઉપરોક્ત ચારેય શખ્સો સામે ભારતીય ન્યાય સંહિતાની જુદી જુદી કલમ ઉપરાંત જી.પી. એક્ટની કલમ હેઠળ ગુનો નોંધી, આગળની તપાસ હેડ કોન્સ્ટેબલ રોહિતભાઈ થાનકી દ્વારા હાથ ધરવામાં આવી છે.

યુવતી સાથે ધરાર સંબંધ રાખવા દબાણ કરી, દ્વારકાના શખ્સ દ્વારા છરીબાજી

દ્વારકામાં રહેતા હસીનાબેન નામની એક યુવતીના ઘરે ગીર સોમનાથ જિલ્લાના વેરાવળ ખાતે રહેતી તેણીની બહેન પોતાના વતનથી આંટો મારવા આવી હતી. ત્યારે તેણીને ઘણા સમયથી મોબાઈલ પર ફોન કરતો રૂપેણ બંદર વિસ્તારમાં રહેતો સબીર ઈસ્માઈલ ભેસલીયા નામના શખ્સ દ્વારા મોબાઈલ ફોન તથા રૂબરૂમાં પરેશાન કરતા આ વચ્ચે શનિવાર તારીખ 8 ના રોજ બપોરના સમયે તેમજ સાંજના સમયે આરોપી સબીર દ્વારા અહીં આવેલી યુવતીને ફોન કર્યો હતો. જેથી તેની બહેન પાસેથી ફોન લઈને હસીનાબેને વાત કરી, તેણીને ફોન નહીં કરવાનો કહ્યું હતું.

આ બાબતે થયેલા ઝઘડા વચ્ચે યુવતીએ આરોપી સાથે કોઈપણ સંબંધ રાખવો નથી તેમ સ્પષ્ટ શબ્દોમાં ના કહી દેતા મોડી રાત્રીના આશરે સાડા દસેક વાગ્યાના સમયે ફરિયાદી યુવતીના ઘરે આરોપી સબીર આવ્યો હતો. અહીં આવેલા આરોપીએ તેણીના ઘરમાં પ્રવેશ કરી અને હસીનાબેનને કહેલ કે "તારે મારી સાથે સંબંધ ન રાખવો હોય તો કાંઈ નહીં પરંતુ તેની બહેન સાથે પોતાનો સંબંધ કરાવી આપ"- આમ કહીને તેની સાથે બળજબરી એને ઝપાઝપી કરી હતી.

આ રીતે આરોપીએ બોલાચાલી કરી અને પોતાની પાસે રહેલી છરી કાઢી અને જાનથી મારી નાખવાના ઈરાદાથી હસીનાબેન પર છરી વડે હુમલો કરી, ઈજાઓ પહોંચાડી હતી. અને જો હજુ ફરિયાદી હસીનાબેન તથા તેની બહેન તેની સાથે સંબંધ નહીં રાખે તો જાનથી મારી નાખવાની ધમકી પણ ઉચ્ચારી હોવાની ધોરણસર ફરિયાદ દ્વારકા પોલીસમાં નોંધવામાં આવી છે. જે અંગે પોલીસે આરોપી સબીર ભેસલીયા સામે બી.એન.એસ. તેમજ જી.પી. એક્ટની કલમ હેઠળ ગુનો નોંધી, આગળની તપાસ પી.એસ.આઈ. ટી.ડી ચુડાસમા દ્વારા હાથ ધરવામાં આવી છે.