હરિયાણામાં વિધાનસભા ચૂંટણી માટે 5 ઓક્ટોબરના રોજ મતદાન થવાનું છે અને આ માટે ચૂંટણી પ્રચાર તેના અંતિમ તબક્કામાં છે. પરંતુ નેતાઓની પક્ષપલટોનો સિલસિલો ચૂંટણી પ્રચારના છેલ્લા દિવસ સુધી ચાલુ રહ્યો હતો. ગઇકાલે હરિયાણામાં આમ આદમી પાર્ટીના ઉમેદવાર પક્ષ બદલીને કોંગ્રેસમાં જોડાયા હતા. ચૂંટણી પ્રચારના છેલ્લા દિવસે અશોક તંવરે પણ પક્ષ બદલ્યો હતો. તંવર માત્ર 8 મહિનામાં જ ભારતીય જનતા પાર્ટી છોડીને કોંગ્રેસમાં ફરી જોડાઈ ગયા છે.

ભાજપના નેતા અશોક તંવર આજે હરિયાણાના મહેન્દ્રગઢ જિલ્લામાં કોંગ્રેસ સાંસદ અને લોકસભામાં વિપક્ષના નેતા રાહુલ ગાંધી અને હરિયાણાના પૂર્વ મુખ્યમંત્રી ભૂપેન્દ્ર સિંહ હુડ્ડાની હાજરીમાં કોંગ્રેસમાં જોડાયા હતા.

અગાઉ આ વર્ષે 20 જાન્યુઆરીએ અશોક તંવર નવી દિલ્હીમાં બીજેપી હેડક્વાર્ટરમાં હરિયાણાના પૂર્વ મુખ્યમંત્રી મનોહર લાલ ખટ્ટરની હાજરીમાં ભારતીય જનતા પાર્ટીમાં જોડાયા હતા. તેઓ એપ્રિલ-મેમાં યોજાયેલી લોકસભા ચૂંટણી દરમિયાન સિરસા બેઠક પરથી ભાજપની ટિકિટ પર લડ્યા હતા. જો કે, તેમને કોંગ્રેસના દિગ્ગજ નેતા કુમારી સેલજાના હાથે 2.50 લાખથી વધુ મતોના માર્જિનથી હારનો સામનો કરવો પડ્યો હતો.

હરિયાણાના ગતિશીલ યુવા નેતાઓમાં જેની ગણતરી થાય છે તેવા અશોક તંવર હરિયાણામાં પ્રદેશ કોંગ્રેસ સમિતિના પ્રમુખ રહી ચૂક્યા છે. તેઓ સિરસાથી લોકસભા સાંસદ અને અખિલ ભારતીય કોંગ્રેસ સમિતિના સચિવ પણ રહી ચૂક્યા છે. તંવર ભારતીય યુવા કોંગ્રેસ અને NSUIના પૂર્વ અધ્યક્ષ પણ રહી ચૂક્યા છે. તેઓ ભારતીય યુવા કોંગ્રેસના પ્રમુખ બનનાર સૌથી યુવા વ્યક્તિ હતા.

દિલ્હીની પ્રતિષ્ઠિત જેએનયુમાંથી વિદ્યાર્થી રાજકારણની શરૂઆત કરનાર અશોક તંવરે 2009ની લોકસભા ચૂંટણી હરિયાણાની સિરસા બેઠક પરથી કોંગ્રેસ પાર્ટીની ટિકિટ પર 3.54 લાખથી વધુ મતોના માર્જિનથી જીતી હતી. જો કે, તેઓ કોંગ્રેસ પાર્ટીના ઉમેદવાર તરીકે ઇન્ડિયન નેશનલ લોકદળના ચરણજીત સિંહ રોરી સામે 2014ની સામાન્ય ચૂંટણી હારી ગયા હતા. તેમણે 2024ની ચૂંટણી ભાજપની ટિકિટ પર લડી હતી, પરંતુ આ વખતે પણ તેમની હાર થઈ હતી.