જમ્મુ-કાશ્મીરમાંથી આર્ટિકલ ૩૭૦ હટાવવાની ઘટનાઓથી સામાન્ય લોકો સારી રીતે વાકેફ છે.  પરંતુ આ આર્ટિકલ હટાવતા પહેલા શું તૈયારીઓ કરવામાં આવી હતી, તે આ ફિલ્મમાં બતાવવામાં આવ્યું છે.  આ ફિલ્મ જમ્મુ અને કાશ્મીરમાંથી કલમ ૩૭૦ નાબૂદ કરવાના વડાપ્રધાન કાર્યાલયના ટોચના ગુપ્ત નિર્ણય પર આધારિત છે, જેમાં જમ્મુ-કાશ્મીર અને લદ્દાખ બંનેને કેન્દ્રશાસિત પ્રદેશો તરીકે જાહેર કરવામાં આવ્યા. આ ફિલ્મ ’ઉરી - ધ સર્જિકલ સ્ટ્રાઈક’નું નિર્દેશન કરનાર આદિત્ય ધરની સાચી ઘટના પર આધારિત બીજી ફિલ્મ છે.

ફિલ્મમાં યામી ગૌતમે આઈબી ઓફિસરની ભૂમિકા ભજવી છે જ્યારે પ્રિયમણિએ પીએમઓ ઓફિસરની ભૂમિકા ભજવી છે. અરુણ ગોહીલ વડાપ્રધાનની ભૂમિકામાં છે જ્યારે કિરણ કર્માકરે ગૃહ પ્રધાનની ભૂમિકા ભજવી છે.
નિર્દેશક આદિત્ય સુહાસ જાંભલેએ એક મહત્ત્વના વિષય પર મહત્ત્વપૂર્ણ ફિલ્મ બનાવી છે. કલમ ૩૭૦નો જન્મ કેવી રીતે થયો? ફિલ્મની શરૂઆતમાં અભિનેતા અજય દેવગણના અવાજમાં સંપૂર્ણ માહિતી આપવામાં આવી છે. આ ૭૦ વર્ષ જૂની ઐતિહાસિક ભૂલને સુધારવા માટે જે સાવધાની અને તૈયારી કરવામાં આવી હતી તેનું ચિત્રણ આ ફિલ્મમાં છે.

ફિલ્મમાં એક ડાયલોગ છે કે જો અમેરિકા ઓસામા બિન લાદેનને પકડવા માટે પાકિસ્તાનને અબજો રૂપિયા આપતું હોય તો પાકિસ્તાન તેને શોધવાનું નાટક જરૂર કરશે. પણ તેને પકડશે નહીં, જેથી તેને ફંડીંગ મળતું રહે.
કાશ્મીરની ખીણમાં પણ આવી જ સ્થિતિ છે.  કાશ્મીરને કેન્દ્ર તરફથી મહત્તમ ભંડોળ મળે છે, જેથી ત્યાં શાંતિ અને વિકાસ થઈ શકે, પરંતુ ટોચના રાજકારણીઓ, ભ્રષ્ટ અમલદારો અને મોટા ઉદ્યોગપતિઓ તેમના ખિસ્સા ભરવા માટે કાશ્મીરની વિવાદાસ્પદ અર્થવ્યવસ્થાનો લાભ લઈ રહ્યા છે.  તેઓ શાંતિ પ્રાપ્ત કરવાનો ડોળ કરે છે. પરંતુ શાંતિ સ્થપાવા દેતાં નથી.

કારણકે અનુચ્છેદ ૩૭૦ના કારણે બધું જ તેમના નિયંત્રણમાં છે. એમ કહેવું કાશ્મીરની સ્થિતિનું વર્ણન કરવા માટે આ પૂરતું છે. આ મુશ્કેલ સંજોગોમાં,  કલમ ૩૭૦ હટાવવા માટે સરકારે કઈ રીતે યોજનાબદ્ધ કામ કર્યું તેના વિશે આ ફિલ્મ ઊંડાણપૂર્વક માહિતી આપે છે.

ભારતીય બંધારણની કલમ ૩૭૦એ જમ્મુ અને કાશ્મીરને વિશેષ દરજ્જો આપ્યો છે. ૫ ઓગસ્ટ, ૨૦૧૯ના રોજ, મોદી સરકારે જમ્મુ અને કાશ્મીરમાંથી કલમ ૩૭૦ નાબૂદ કરી હતી.  ઉપરાંત, રાજ્યને બે ભાગો, જમ્મુ-કાશ્મીર અને લદ્દાખમાં વહેંચવામાં આવ્યું હતું અને બંનેને કેન્દ્રશાસિત પ્રદેશ બનાવવામાં આવ્યા હતા.

ઇન્ટરવલ પહેલાં, ફિલ્મ આપણને કાશ્મીરમાં તણાવ, ભ્રષ્ટાચાર અને આતંકવાદી પ્રવૃત્તિઓ દ્વારા પ્રવર્તતી પરિસ્થિતિનો પરિચય કરાવે છે.  કેવી રીતે ભાડૂતી પથ્થરબાજોને  તરફથી ટેકો અને ફંડિંગ મળી રહ્યું હતું.  પોતાનો રોટલો શેકતા રાજકારણીઓ કેવી રીતે કાશ્મીરના દુશ્મન બની ગયા, વગેરે પાસાઓને ફિલ્મમાં ખૂબ ઊંડાણ અને ગંભીરતા સાથે દર્શાવવામાં આવ્યા છે.
ઇન્ટરવલ પછી, કલમ ૩૭૦ હટાવવાના માર્ગમાં આવતા બંધારણીય અવરોધોને પણ ફિલ્મમાં વિગતવાર સમજાવવામાં આવ્યા છે. આ તકનીકી પાસું જટિલ છે, પરંતુ મહત્ત્વપૂર્ણ છે. ફિલ્મના સંવાદો પણ ઘાતક છે. વચ્ચે કાશ્મીરી ભાષાનો સ્પર્શ સ્થાનિકતાનો અહેસાસ કરાવે છે.

ફિલ્મનું વર્ણન અલગ-અલગ ચેપ્ટરમાં રજૂ કરવામાં આવ્યું છે, જે રસપ્રદ છે.  એક તરફ ફિલ્મ દ્વારા દેશભક્તિની ભાવનાને જાગૃત કરવાનો પ્રયાસ કરવામાં આવ્યો છે, તો બીજી તરફ આ ફિલ્મમાં કલમ ૩૭૦ નાબૂદ કરવાની જરૂરિયાત પર ભાર મૂકવામાં આવ્યો છે.  
 કલાકારોનો અભિનય આ ફિલ્મની સૌથી મજબૂત કડી સાબિત થાય છે, જેમાં યામી ગૌતમ ફરી એકવાર તેના શક્તિશાળી અભિનયને લીધે બાજી મારી ગઇ છે. તેનો મેકઅપ વિનાનો દેખાવ અને તેના પાત્રનો ગુસ્સો તેના અભિનયને ખાસ બનાવે છે.પ્રિયમણિ જેવી સાઉથની આશાસ્પદ અભિનેત્રી અભિનયના મામલામાં યામીથી નબળી નથી. બેય અભિનેત્રીઓને પડદા પર બે મજબૂત પાત્રોમાં કેન્દ્રસ્થાને જોવી એ લ્હાવો છે.

 અભિનેત્રીઓ અને સહાયક ભૂમિકા ભજવતા કલાકારો બંને તેમના અભિનયથી તેમને આકર્ષિત કરવામાં સફળ થાય છે.  કાશ્મીરી નેતા અને ભૂતપૂર્વ મુખ્ય પ્રધાન તરીકે રાજ ઝુત્સી, કમાન્ડર યશ ચૌહાણ તરીકે વૈભવ તત્વવાદી, ખાવર અલી તરીકે રાજ અરુણ, વડા પ્રધાન તરીકે અરુણ ગોહીલ અને ગૃહ પ્રધાન તરીકે કિરણ કર્માકર તેમના અભિનયથી પ્રેક્ષકોને જકડી રાખે છે.  ફિલ્મનું બેકગ્રાઉન્ડ મ્યુઝિક મજબૂત અને થીમને અનુરૂપ છે.  
ટેકનિકલી ફિલ્મ મજબૂત છે, જોવા માટે કેટલા દર્શકો જશે તે પ્રશ્ન છે. ફિલ્મમાં ગીતો જબરદસ્તી નાખવામાં આવ્યા નથી, જે બહુ સારી બાબત છે.
​​​​​​​
એક્સ્ટ્રા શોટ :
આ ફિલ્મના દિગ્દર્શક આદિત્ય સુહાસ જાંભલે બે વખત રાષ્ટ્રીય પુરસ્કાર વિજેતા ગોઆન ફિલ્મ નિર્દેશક, લેખક અને અભિનેતા છે. તેમની પ્રથમ શોર્ટ ફિલ્મ આબા ઐકતાય ના?ને  ૬૪મા રાષ્ટ્રીય ફિલ્મ પુરસ્કાર ૨૦૧૬માં શ્રેષ્ઠ દિગ્દર્શન (ગોલ્ડન લોટસ) માટેનો રાષ્ટ્રીય પુરસ્કાર મળેલો. તેમની બીજી ટૂંકી ફિલ્મ ખારવાસને  ૨૦૧૮માં ભારતીય પેનોરમા () માટે ઓપનિંગ ફિલ્મ તરીકે પસંદ કરવામાં આવી હતી જેને શ્રેષ્ઠ ટૂંકી ફિલ્મ માટે બીજો રાષ્ટ્રીય પુરસ્કાર મળ્યો હતો. તેઓ છેલ્લા ૧૦ વર્ષથી મરાઠી થિયેટર ક્ષેત્રે સક્રિયપણે સંકળાયેલા છે.