પોલીસ અને આસામ રાઈફલ્સની સંયુક્ત ટીમે મણિપુરના ત્રણ જિલ્લામાંથી હથિયાર અને દારૂગોળો જપ્ત કર્યો છે. પોલીસે આજે જાહેર કરેલા નિવેદનમાં આ માહિતી આપવામાં આવી છે. નિવેદનમાં કહેવામાં આવ્યું છે કે કાંગપોકપી જિલ્લાના લોઇચિંગ વિસ્તારમાંથી બે 303 રાઇફલ, એક 9 એમએમ પિસ્તોલ, મેગેઝીન, કારતુસ, ચાર હેન્ડ ગ્રેનેડ, બે ડિટોનેટર, એક દેશી બનાવટનો મોર્ટાર અને એક ઇમ્પ્રુવાઇઝ્ડ મોર્ટાર મળી આવ્યો છે.

મણિપુર પોલીસ, BSF અને CRPF દ્વારા અન્ય સર્ચ ઓપરેશનમાં ચુરાચંદપુર જિલ્લાના ગોથોલ ગામમાંથી સ્થાનિક રીતે પમ્પી તરીકે ઓળખાતા ઇમ્પ્રુવાઇઝ્ડ મોર્ટાર જપ્ત કરવામાં આવ્યા હતા. આ સિવાય થૌબલ જિલ્લાના ફાનોમ પહાડી વિસ્તારમાંથી HE-36 હેન્ડ ગ્રેનેડ, બે પંપ, ડિટોનેટર સાથેના ત્રણ સ્ટન ગ્રેનેડ, સ્ટિંગર ગ્રેનેડ અને ટીયર ગેસના શેલ મળી આવ્યા હતા. ગઈકાલે આ વિસ્તારોમાં સર્ચ ઓપરેશન દરમિયાન સુરક્ષા દળોએ આ હથિયારો જપ્ત કર્યા હતા. આ કેસમાં હજુ સુધી કોઈની ધરપકડ કરવામાં આવી નથી.

મણિપુરમાં ગયા વર્ષથી ચાલુ છે હિંસા

મણિપુરમાં મેઇતેઇ અને કુકી સમુદાયો વચ્ચે ગયા વર્ષના મે મહિનાથી હિંસા ચાલી રહી છે.  જેના કારણે રાજ્યમાં સ્થિતિ ખૂબ જ ખરાબ બની રહી છે. બે સમુદાયો વચ્ચે સમયાંતરે વિવાદો થતા રહે છે. હાલમાં રાજ્યમાં થઈ રહેલી હિંસામાં 200થી વધુ લોકોએ જીવ ગુમાવ્યા છે અને હજારો લોકો બેઘર પણ થઈ ગયા છે. લોકોના ઘરો અને ધાર્મિક સ્થળોમાં તોડફોડના ઘણા કિસ્સાઓ પણ પ્રકાશમાં આવ્યા છે. હિંસા વધવાને કારણે રાજ્યમાં ઈન્ટરનેટ સેવાઓ પણ બંધ કરી દેવામાં આવી હતી.

બે જ્ઞાતિઓ વચ્ચે શું છે વિવાદ?

મણિપુરમાં થઈ રહેલી જ્ઞાતિ હિંસાને અનેક સામાજિક મુદ્દાઓએ જન્મ આપ્યો છે. અંગ્રેજોએ મણિપુરને પહાડો અને ખીણ એમ બે ભાગોમાં વહેંચી દીધું હતું અને બંનેને અલગ વહીવટ હેઠળ મૂક્યા હતા. આ વિભાજન બે સમુદાયો વચ્ચે તણાવનું સૌથી મોટું કારણ છે. આ સિવાય સંસાધનોનો લાભ, આર્થિક લાભો, સરકારી નોકરીઓ, અનામત વગેરે જેવા ઘણા મુદ્દા છે જે આ હિંસાનું કારણ બની શકે છે.