દરેક છોકરીની પહેલી ઈચ્છા હોય છે કે તેનો પાર્ટનર સ્વભાવે ખૂબ જ રોમેન્ટિક અને કેરિંગ હોવો જોઈએ. આ ઈચ્છા પૂરી કરવા માટે તે ક્યારેક પોતાના પાર્ટનરના દેખાવ પર ધ્યાન આપે છે તો ક્યારેક તેના સ્વભાવ પર. પરંતુ જ્યારે સારા સંબંધની વાત આવે છે, ત્યારે વ્યક્તિ માટે સારું વ્યક્તિત્વ હોવું આ બંને બાબતો કરતાં વધુ મહત્વનું છે. આ એક એવી ગુણવત્તા છે જેની સાથે કોઈ પણ સંજોગોમાં સમાધાન કરી શકાતું નથી. દરેક સંબંધ જેમાં પ્રેમ અને સન્માન બંને હોય છે તે લાંબા સમય સુધી ટકે છે. ભાગ્યે જ કોઈ વ્યક્તિ હશે જે આ વાતને નકારશે. પરંતુ સંબંધો પરનો તાજેતરનો અભ્યાસ સફળ સંબંધ માટે એક અલગ માપદંડ નક્કી કરે છે. સ્ટડી મુજબ, સંબંધની સફળતાનો દર મોટાભાગે વ્યક્તિના ચહેરા પર દેખાતા વાળ દ્વારા નક્કી કરવામાં આવે છે. આ અભ્યાસ સૂચવે છે કે દાઢી ધરાવતા પુરુષો દાઢી ન ધરાવતા પુરુષો કરતાં વધુ 'સ્થિર' રોમેન્ટિક પાર્ટનર હોય શકે છે.

આ અભ્યાસ ક્યાં કરવામાં આવ્યો હતો?

આર્કાઈવ્સ ઓફ સેક્સ્યુઅલ બિહેવિયરમાં પ્રકાશિત થયેલ આ અભ્યાસ જણાવે છે કે દાઢી રાખનારા પુરૂષો નવા જીવનસાથીની શોધમાં હોય તે જરૂરી નથી. આવા લોકો પોતાના વર્તમાન પાર્ટનરથી ખુશ હોય છે. જ્યારે ક્લીન શેવ ધરાવતા પુરુષો મોટાભાગે નવા જીવનસાથીની શોધમાં હોય છે. સંબંધો પરના આ અભ્યાસમાં 18 વર્ષથી 40 વર્ષની વયના લગભગ 414 પુરુષોએ ભાગ લીધો હતો.

દાઢી સાથે શું સંબંધ છે?

દાઢીવાળા પુરૂષો અને સંબંધો અંગેની તેમની સમજણ અંગે આપવામાં આવેલા તારણો પાછળ ઘણા કારણો દર્શાવવામાં આવ્યા છે. પ્રથમ દલીલ એ છે કે દાઢી વધારવા અને કેર કરવા માટે ઘણી મહેનત કરવી પડે છે. દાઢી ઉગાડવી એ મુશ્કેલ અને સમય માંગી લેતું કામ છે. ત્યારે દાઢી ધરાવતા પુરૂષો તેમના શિસ્તબદ્ધ અને સંયમિત સ્વભાવને દર્શાવે છે.

અભ્યાસમાં એમ પણ કહેવામાં આવ્યું છે કે વ્યક્તિએ પોતાના ચહેરાને સ્વચ્છ રાખવા માટે વારંવાર ક્લીન શેવ કરવો પડે છે પરંતુ દાઢી સાથે ચહેરો સાફ રાખવા માટે ચહેરાના વાળની ​​વધારાની કાળજી લેવી પડે છે. જેમાં વધુ મહેનત, સંસાધનો અને સમય લાગે છે. જે વ્યક્તિ પોતાની દાઢી સારી રીતે જાળવી શકે છે તે કોઠાસૂઝ ધરાવનાર અને સંગઠિત વ્યક્તિની પરીક્ષામાં પાસ થઈ શકે છે.

અભ્યાસ મુજબ, જે પુરુષોના ચહેરા પર દાઢી હોય છે તેઓ સંબંધમાં આવ્યા પછી તેમના રોમેન્ટિક સંબંધો અને પરિવાર પર ધ્યાન કેન્દ્રિત કરે છે. તેથી આ અભ્યાસ મુજબ જ્યારે ડેટ પર જાઓ ત્યારે દાઢી ધરાવતા પુરુષ સાથે જવાનું વિચારો.