રાજકોટ મહાપાલિકાની વિવિધ સેવાઓને લગતી ફરિયાદો માટે હવેથી શોર્ટ કોર્ડ નં.૧૫૫૩૦૪ ઉપર જ ફરિયાદ કરવા મહાપાલિકા તંત્ર દ્વારા નાગરિકોને અપીલ કરાઈ છે, કોલ સેન્ટરના જુના નંબર ૦૨૮૧-૨૪૫૦૦૭૭ ઉપર ફરિયાદ નહીં કરવા અનુરોધ કરાયો છે, કોલ સેન્ટરનો આ જૂનો નંબર આગામી એપ્રિલ માસથી સદંતર બંધ કરવામાં આવનાર હોય નવો નંબર નોંધી લેવા અપીલ કરાઈ છે.

રાજકોટ મહાનગરપાલિકા દ્વારા મહાનગરપાલિકાની વિવિધ સેવાઓને લગત નાગરિકોની ફરિયાદોની નોંધણી માટે વર્ષ ૨૦૦૮થી અમીનમાર્ગ ખાતે ૨૪ x ૭ કોલ સેન્ટર ચાલુ કરવામાં આવેલ છે, જેમાં વાર્ષિક ૩.૭૫ લાખ ફરિયાદો નોંધવામાં આવે છે. આ માટે મહાનગરપાલિકા દ્વારા લેન્ડલાઈન નંબર ૦૨૮૧-૨૪૫૦૦૭૭ કે જેમાં પાંચ હન્ટીંગ લાઈન સામેલ છે તેમજ ટોલ ફ્રી નંબર ૧૮૦૦-૧૨૩-૧૯૭૩ ઉપર શહેરનાં નાગરિકો ફોન દ્વારા તેઓની મહાનગરપાલિકાની સેવાઓ અંગે ફરિયાદો નોંધાવી શકે છે તે પ્રકારની વ્યવસ્થા અમલમાં મુકેલ છે. ભારત સરકારનાં Ministry of Communication & Information Technology નાં Department Of Telecommunications (DOT) દ્વારા ભારતની તમામ મહાનગરપાલિકાઓની વિવિધ સેવાઓ અંગેની ફરિયાદો માટે અલગ અલગ નંબરને બદલે તમામ ફરિયાદોની નોંધણી સમગ્ર દેશમાં એક જ કોમન નંબર દ્વારા કરી શકાય તેવી વ્યવસ્થા શરુ કરવામાં આવેલ છે. આ માટે ૧૫૫૩૦૪ નંબરનો શોર્ટ કોડ અમલમાં મુકવામાં આવેલ છે. ભારત સરકારની આ યોજનાનો અમલ રાજકોટ મહાનગરપાલિકા દ્વારા કરવામાં આવેલ છે. હાલમાં કોલ સેન્ટરનાં નંબર ૦૨૮૧-૨૪૫૦૦૭૭ તેમજ ટોલ - ફ્રી નંબર ૧૮૦૦-૧૨૩-૧૯૭૩નાં સ્થાને શોર્ટ કોર્ડ નંબર ૧૫૫૩૦૪ પરથી લોકો પોતાની મહાનગરપાલિકાની સેવાઓ અંગેની ફરિયાદો નોંધાવી શકશે.

હાલમાં મહાનગરપાલિકાની સેવાઓ અંગેની ફરિયાદો લોકો ૦૨૮૧-૨૪૫૦૦૭ અને ૧૮૦૦-૧૨૩-૧૯૭૩ ને બદલે એક જ શોર્ટ કોડ ૧૫૫૩૦૪ નંબર ડાયલ કરી સરળતાથી નોંધાવી શકે છે. આગામી તા.૩૧-૦૩-૨૦૨૫ સુધી લોકો ૦૨૮૧-૨૪૫૦૦૭, ૧૮૦૦-૧૨૩-૧૯૭૩ અને શોર્ટ કોડ ૧૫૫૩૦૪ પર ફરિયાદો નોંધાવી શકશે. તા.૧-૪-૨૦૨૫થી મહાનગરપાલિકાને લગત સેવાઓ અંગેની ફરિયાદો ફકત શોર્ટકોડ ૧૫૫૩૦૪ પરથી જ ફરિયાદો નોંધાવી શકાશે.

આ સેવાઓમાં સમગ્ર દેશમાં એક જ શોર્ટ કોડ નંબર ૧૫૫૩૦૪ દ્વારા મહાનગરપાલિકાઓની સેવાઓ અંગેની ફરિયાદોની નોંધણી થશે. ઉપરોકત નંબર ૧૫૫૩૦૪ ને Category-1 નંબર તરીકે જાહેર કરવામાં આવેલ છે આથી તમામ ટેલિકોમ ઓપરેટરોને ફરજીયાત પણે આ સર્વિસ પ્રોવાઈડ કરવાની રહેશે.અન-રીસ્ટ્રીકટેડ સર્વિસ જે એસટીડી કોડ ઉપર પણ અવેલેબલ થશે. આ ઉપરાંત હાલની કોલ સેન્ટરની સેવાઓને મહાનગરપાલિકાનાં પોતાના ડાર્ક ફાયબર દ્વારા મહાનગરપાલિકાનાં સેન્ટ્રલ ઝોન સર્વર સાથે કનેક્ટ કરવામાં આવેલ છે. આથી લોકોને મહાનગરપાલિકાની સેવાઓ અંગેની પોતાની ફરિયાદો નોંધાવવામાં સરળતા રહેશે. આ ઉપરાંત મહાપાલિકાની વેબસાઈટ, મોબાઈલ એપ તેમજ વોટ્સએપ ચેટબોટ દ્વારા પણ લોકો પોતાની ફરિયાદો નોંધાવી શકે છે તેમ મહાપાલિકાની આઇટી.બ્રાન્ચના ડિરેક્ટરએ જણાવ્યું હતું.