ઓખા મંડળના મીઠાપુર વિસ્તારમાં રહેતા મેહુલ કમલેશભાઈ પરમાર નામના યુવાન સાથે ગત તારીખ 25-07-2024 ના રોજ રાત્રિના સમયે બોલાચાલી કરી, તેમને ગાળો કાઢીને બળજબરીપૂર્વક બાવડું પકડી અને પોતાના મોટરસાયકલ પર બેસાડીને અપહરણ થયાની ફરિયાદ મીઠાપુર પોલીસ મથકમાં નોંધાવવામાં આવી હતી.

આ પ્રકરણમાં આરોપીઓએ મેહુલને પોતાના ઘરે લઈ જઈને અહીં રહેલા અન્ય આરોપીઓએ સાથે મળીને તેમને ઢોર માર મારી, ગાળો ભાંડીને તેમના પેન્ટના ખિસ્સામાં રહેલા પાકીટમાંથી રોકડ રકમ લઈ, રૂ. 2,000 ની લૂંટ ચલાવ્યાની ધોરણસર ફરિયાદ નોંધાઈ હતી. આ પ્રકરણમાં આરોપી રાહુલ ધનાભાઈ રોશિયા અને દેવશી ધનાભાઈ રોશિયા દ્વારા દ્વારકાની એડિશનલ સેશન્સ અદાલતમાં આગોતરા જમીન માટે અરજી કરવામાં આવી હતી. ત્યારબાદ આરોપીએ ફરિયાદીને ઈન્સ્ટાગ્રામ ઉપર પણ ધમકી આપી, ગાળો કાઢી હોવાનું વધુમાં ખુલવા પામ્યું હતું. જેથી આરોપીઓને આગોતરા જામીન ન મળે તે અંગે મૂળ ફરિયાદીએ તેમના વકીલ મારફતે અદાલત સમક્ષ વાંધાઓ રજૂ કરવામાં આવ્યા હતા.

આ પ્રકરણમાં આરોપી તરફે વિદ્વાન વકીલ જીતેન્દ્રભાઈ કે. હિંડોચા વિગેરેની દલીલોને ધ્યાને લઈને દ્વારકાના એડિશનલ જજ શ્રી કે.જે. મોદી દ્વારા ઉપરોક્ત બંને આરોપીઓના જામીન મંજૂર કરી, તેઓને જામીન મુક્ત કરવાનો હુકમ કર્યો હતો.