દરેડ, ચેલા, જામનગર તાલુકા, શંકરટેકરી, દિ.પ્લોટ, પવનચક્કી, નિલકંઠનગર અને શહેર વિસ્તારમાં ૧૪૧ વિજ કનેકશનો ચેક કરાયા: જેમાં રર માં વિજચોરી પકડાઇ

જામનગર પીજીવીસીએલ કચેરી દ્વારા છેલ્લા કેટલાક  દિવસ થી હાલાર  પંથકમાં પાવર ચોરી ઝડપી લેવા માટે ચેકિંગ કામગીરી કરવામાં આવી રહી છે. ગઇકાલે ચેકીંગ દરમ્યાન  રુા. ૧૭.૪૫ લાખની પાવર ચોરી ઝડપી લેવામાં આવી છે.
પીજીવીસીએલના કોર્પોરેટ ચેકિંગ ડ્રાઇવ અંતર્ગત ગઇકાલેે જામનગર શહેર  ના શંકર ટેકરી, પવનચક્કી, દિગ્વિજય પ્લોટ, નીલકંઠ નગર તેમજ તાલુકાના દરેડ અને ચેલા  ગામમાં વીજ ચેકીંગ કરવામાં આવ્યું હતું.
 ૧૭ ટીમ દ્વારા કરાયેલી કામગીરી  દરમિયાન કુલ ૧૪૧ વીજ જોડાણ  તપાસવામાં આવ્યા હતા એમાંથી ૨૨ વીજ જોડાણમાં ગેરરીતિ  જણાતા આવા આસામીઓને રુા. ૧૭.૪૫ લાખના વીજ બિલો આપવામાં આવ્યા હતા.
પીજીવીસીએલ દ્વારા કરાયેલી ચેકીંગની કામગીરીમાં ૧૭ ટીમો જોડાઇ હતી, જેમાં રર કનેકશનોમાં લંગરીયા, ડાયરેકટ જોડાણ, મીટર ચેડા સહિતના કનેકશનો જણાતા તમામને દંડ ફટકારવામાં આવ્યો હતો, ચેકીંગ સમયે એસઆરપીના ૧૧ જવાનો હાજર રહ્યા હતા.