ઉત્તરાખંડના ઉત્તરકાશી જિલ્લામાં ગઈકાલે રાત્રે ત્રણ કલાક સુધી સતત વરસાદ બાદ વરુણાવત પર્વત પર ફરી એકવાર ભૂસ્ખલન શરૂ થયું. 45 મિનિટના ગાળામાં ટેકરી પરથી પાંચ ભૂસ્ખલન થયા હતા. મોટી માત્રામાં પથ્થરો અને કાટમાળ પડવાને કારણે મસ્જિદ મોહલ્લા, જલ સંસ્થાન કોલોની અને ગોફિયારા વિસ્તારમાં ગભરાટ ફેલાઈ ગયો હતો.

50 પરિવારોએ સલામત સ્થળે લીધો આશરો

લગભગ 50 પરિવારો ઝડપથી તેમના ઘર છોડીને ભાગી ગયા અને સલામત સ્થળોએ આશરો લીધો. ઘટનાની માહિતી મળતા જ જિલ્લા ડિઝાસ્ટર મેનેજમેન્ટ સક્રિય થઈ ગયું હતું. જિલ્લા આપત્તિ વ્યવસ્થાપન અધિકારી દેવેન્દ્ર પટવાલ, અધિક જિલ્લા મેજિસ્ટ્રેટ રઝા અબ્બાસ, નાયબ જિલ્લા મેજિસ્ટ્રેટ બ્રિજેશ કુમાર તિવારી તાત્કાલિક જિલ્લા ડિઝાસ્ટર ઓપરેશન સેન્ટર પર પહોંચી ગયા હતા અને પરિસ્થિતિનો તાગ મેળવ્યો હતો.

લોકોને એલર્ટ કરવામાં આવી રહ્યા છે

જિલ્લા આપત્તિ વ્યવસ્થાપન અધિકારી દેવેન્દ્ર પટવાલે જણાવ્યું હતું કે ભૂસ્ખલનમાં કોઈ જાનહાની કે સંપત્તિનું નુકસાન થયું નથી. ભૂસ્ખલનના ભયથી ડરેલા પરિવારોને પહેલાથી જ ધર્મશાળા અને સંબંધીઓના ઘરે મોકલવામાં આવ્યા છે.

50 પરિવારોને મકાન ખાલી કરવા નોટિસ

ભૂસ્ખલન પ્રભાવિત વિસ્તારમાં જોખમને ધ્યાનમાં રાખીને વહીવટીતંત્રે 50 પરિવારોને તેમના ઘર ખાલી કરવા માટે નોટિસ આપી છે. જોકે મંગળવારે માત્ર નવ પરિવારોએ જ વહીવટીતંત્રને મકાન ખાલી કરવા અંગે જાણ કરી હતી. વહીવટીતંત્રે અસરગ્રસ્ત પરિવારોને રહેવા માટે બે ધર્મશાળાઓમાં 10-10 રૂમની વ્યવસ્થા પણ કરી છે.