પ્રાણીઓની સુરક્ષા, બચાવ અને સારવાર માટે જાણીતી અનંત અંબાણીની સંસ્થા 'વંતારા' (Vantara) હવે ફૂડ બિઝનેસના ક્ષેત્રમાં પણ આગળ વધી ચૂકી છે. વંતારાએ લક્ઝરી ફૂડ માર્કેટમાં પ્રવેશતા પોતાનું પ્રીમિયમ આઇસક્રીમ બ્રાન્ડ 'વંતારા ક્રીમરી' (Vantara Creamery) લોન્ચ કર્યું છે. મુંબઈના જીઓ વર્લ્ડ ડ્રાઈવ (Jio World Drive) ખાતે એક આકર્ષક આઇસક્રીમ ટ્રક દ્વારા આ બ્રાન્ડની શરૂઆત કરવામાં આવી છે, જે તેના અનોખા સ્વાદ અને પ્રીમિયમ ક્વોલિટીના કારણે ભારે ચર્ચામાં છે.

પ્રાણી કલ્યાણ માટે 2024 થી કાર્યરત વંતારાએ હવે પ્રીમિયમ આઇસક્રીમ માર્કેટમાં ધમાકેદાર એન્ટ્રી કરી છે. વંતારાનું જામનગરમાં 3500 એકરમાં ફેલાયેલું વિશાળ વાઇલ્ડલાઇફ રિહેબિલિટેશન સેન્ટર આવેલું છે, જેનું ઉદ્ઘાટન વડાપ્રધાન નરેન્દ્ર મોદીએ કર્યું હતું. આ સેન્ટર સાથે જોડાયેલા પશુઓ અને સ્વાદના સમન્વયથી આ નવું સાહસ શરૂ કરાયું છે.

આઇસક્રીમની મુખ્ય ખાસિયતો
આ આઇસક્રીમ સામાન્ય આઇસક્રીમ કરતા ઘણી અલગ અને પ્રીમિયમ છે: આ આઇસક્રીમની સૌથી મોટી ખાસિયત એ છે કે તે વંતારાના જામનગર સેન્ટર ખાતે આશ્રય મેળવેલી દેશી ગીર ગાયોના શુદ્ધ A2 દૂધમાંથી બનાવવામાં આવે છે. આ આઇસક્રીમ નાના બેચમાં હાથથી તૈયાર કરવામાં આવે છે. તેમાં કોઈ પણ પ્રકારનું વેજીટેબલ ફેટ કે આર્ટિફિશિયલ પ્રિઝર્વેટિવ્સ (કૃત્રિમ રસાયણો) ઉમેરવામાં આવતા નથી.

મેન્યૂ અને 17 અનોખા ફ્લેવર્સ
ભારતીય સ્વાદ અને બાળપણની યાદોને ધ્યાનમાં રાખીને વંતારા ક્રીમરીએ કુલ 17 ફ્લેવર્સ રજૂ કર્યા છે, જેને ચાર મુખ્ય કેટેગરીમાં વહેંચવામાં આવ્યા છે:

ઓલ ડે (All Day) ફ્લેવર્સ: આ કેટેગરીમાં ડાર્ક ચોકલેટ વિથ સી સોલ્ટ, કુકીઝ એન્ડ ક્રીમ, બટર સોલ્ટેડ કેરેમલ અને સ્ટ્રોબેરી રિપલ જેમ જેવા સદાબહાર સ્વાદ સામેલ છે.

સીઝનલ (Seasonal) ફ્લેવર્સ: આમાં ફળોના તાજા સ્વાદનો અનુભવ કરાવતા જામફળ મરચું (અમરૂદ મિર્ચ), પૅશન ફ્રુટ સોર્બેટ, ફ્રેશ લીચી, લેમન સોર્બેટ અને રાસ્પબેરી સોર્બેટનો સમાવેશ થાય છે.

નોસ્ટાલ્જિક (Nostalgic) ફ્લેવર્સ: બાળપણની યાદો તાજી કરાવવા માટે આ કેટેગરીમાં કેસર પેંડા, મલાઈ કુલ્ફી, જલેબી ક્રંચ, ચીકુ, જાંબુ સોર્બેટ અને ફિલ્ટર કોફી જેવા ખાસ ભારતીય સ્વાદ ઉમેરાયા છે.

ક્લાસિક (Classic) ફ્લેવર્સ: આમાં ગોળ સાથે ટોસ્ટેડ નાળિયેર (ગોળ-કોકોનટ) અને રોસ્ટેડ બદામ જેવા પરંપરાગત સ્વાદનો આનંદ માણી શકાશે.

શરૂઆતી કિંમત અને પ્રીમિયમ રેન્જ
શુદ્ધ અને લક્ઝરી સામગ્રીનો ઉપયોગ થતો હોવાથી આ આઇસક્રીમની કિંમત સામાન્ય કરતા ઘણી વધારે છે. વંતારા ક્રીમરીના આઇસક્રીમની શરૂઆત 750 રૂપિયા પ્રતિ સ્કૂપ થી થાય છે (ટેક્સ અલગથી રહેશે). આ ઉપરાંત, કેટલાક ખાસ અને સિગ્નેચર ફ્લેવર્સની કિંમત પ્રતિ સ્કૂપ 1,000 રૂપિયા સુધી પહોંચી શકે છે.

​​​​​​​ગ્રાહકો માટે માત્ર સ્વાદ જ નહીં, પરંતુ હેલ્ધી અને નેચરલ આઇસક્રીમનો આ નવો વિકલ્પ દેશના પ્રીમિયમ ફૂડ સેક્ટરમાં આકર્ષણનું કેન્દ્ર બન્યો છે.