સોની ટીવીના ક્વિઝ રિયાલિટી શો 'કૌન બનેગા કરોડપતિ 16'ના લેટેસ્ટ એપિસોડમાં, સવાઈ માધોપુરની રહેવાસી 27 વર્ષીય નરેશી મીનાએ ફાસ્ટેસ્ટ ફિંગર ફર્સ્ટ રાઉન્ડ જીત્યો. ફાસ્ટેસ્ટ ફિંગર ફર્સ્ટ જીત્યા પછી અમિતાભ બચ્ચને ખૂબ જ પ્રેમથી નરેશી મીનાને હોટસીટ પર બેસવાનું આમંત્રણ આપ્યું. રાજસ્થાનમાં રહેતી નરેશી મીના બ્રેઈન ટ્યુમર જેવી બીમારીથી પીડિત છે. જ્યારે અમિતાભ બચ્ચનને આ વિશે ખબર પડી ત્યારે તેઓ નરેશીથી પ્રભાવિત થયા હતા. જેમણે પોતાની બીમારી હોવા છતાં હસીને પોતાનું જીવન જીવે છે.

અમિતાભ બચ્ચનની સામે હોટસીટ પર બેસીને નરેશીએ તેને પૂછેલા દરેક સવાલના જવાબ પૂરા આત્મવિશ્વાસ સાથે આપ્યા. જે રીતે કૌન બનેગા કરોડપતિમાં અમિતાભ બચ્ચન દ્વારા પૂછવામાં આવેલા પ્રશ્નોના જવાબ આપી રહી હતી, તેનાથી સાબિત થઈ ગયું હતું કે હવે નરેશીના ઈરાદા અને તેની જીત વચ્ચે કોઈ ટકી શકશે નહીં. નરેશીના પ્રશ્ન-જવાબ દરમિયાન તેમના વિશેની માહિતી આપતો વિડિયો સૌ સમક્ષ રજૂ કરવામાં આવ્યો હતો. આ વીડિયોમાં તેના પિતાએ પોતાની પુત્રીની બીમારી અંગે મોટો ખુલાસો કર્યો છે.

નરેશી સારવાર માટે પૈસા ભેગા કરવા KBCમાં જોડાયા

આ વીડિયો જોયા બાદ નરેશીએ અમિતાભ બચ્ચનને કહ્યું, “સર, વર્ષ 2018માં અમને ખબર પડી કે મને બ્રેઈન ટ્યુમર છે. મેં 5 વર્ષ પહેલા 2019માં આ ગાંઠની સર્જરી પણ કરાવી હતી. આ રોગની સારવાર માટે અમારી પાસે પૈસા નહોતા. મારી સારવાર માટે મારી માતાએ પોતાના ઘરેણાં વેચવા પડ્યા પરંતુ સર્જરી કરવા છતાં ડોક્ટરો આખી ગાંઠ કાઢી શક્યા ન હતા. આ ગાંઠ એવી નાજુક જગ્યાએ છે જ્યાં અમે ફરીથી સર્જરી થઇ શકે એમ નથી. હવે ડોકટરોએ પ્રોટોન થેરાપી સૂચવી છે જે ખૂબ જ ખર્ચાળ છે અને આ સારવાર સમગ્ર ભારતમાં માત્ર 2-4 હોસ્પિટલોમાં ઉપલબ્ધ છે અને આ સારવારની કિંમત લગભગ 25-30 લાખ રૂપિયા છે.

અમિતાભ બચ્ચન ભાવુક થઈ ગયા

નરેશીએ વધુમાં કહ્યું, "હું મારી સારવાર માટે જરૂરી પૈસા જીતવા કૌન બનેગા કરોડપતિના મંચ પર આવી છું." તેની વાત સાંભળીને અમિતાભ બચ્ચન ખૂબ જ ભાવુક થઈ ગયા અને કહ્યું, “નરેશી, હું તમારી સારવાર માટે જરૂરી પ્રોટોન થેરાપીનો ખર્ચ ઉઠાવવાનો શ્રેષ્ઠ પ્રયાસ કરીશ. હું તમારો સહાયક બનવા માંગુ છું, તમે આ શોમાંથી જે પણ રકમ જીતશો તે તમારી હશે અને તમારી સારવાર વિશે નિશ્ચિંત રહો."

અમિતાભ બચ્ચને વખાણ કર્યા

જ્યારે નરેશીએ તેમની મદદ માટે બિગ બીનો આભાર માનવાનો પ્રયાસ કર્યો ત્યારે તેમણે તેની પ્રશંસા કરી અને કહ્યું, “એક મહિલાને રાષ્ટ્રીય પ્લેટફોર્મ પર પોતાની બીમારી વિશે ખુલીને વાત કરવા માટે ઘણી હિંમતની જરૂર છે. તમારી ધીરજ બદલ અમે તમારો ખૂબ ખૂબ આભાર માનીએ છીએ. મને ખાતરી છે કે તમે આ શોમાંથી સારી એવી રકમ જીતીને ઘરે જશો.” આજે એટલે કે 22મી ઓગસ્ટે નરેશીએ એક કરોડ માટે પૂછાયેલા પ્રશ્નનો જવાબ આપવાનો પ્રયાસ કરવાનો છે.