આ દિવસોમાં ચારધામ યાત્રાના કેટલાક વીડિયો અને તસવીરો સોશિયલ મીડિયા પર ખૂબ વાયરલ થઈ રહી છે, જેમાં શ્રદ્ધાળુઓની ભીડ એવી રીતે જોવા મળી રહી છે કે લોકો માટે ત્યાંથી બહાર નીકળવું ખૂબ મુશ્કેલ લાગે છે. ભક્તોને ભારે હાલાકીનો સામનો કરવો પડી રહ્યો છે એટલું જ નહીં, સરકાર ભીડને નિયંત્રિત કરવામાં પણ સંઘર્ષ કરી રહી છે. અત્યારે લોકોને ચારધામ યાત્રામાં ન આવવા અપીલ કરવામાં આવી રહી છે.

આ યાત્રા માટે લાખો લોકો નોંધાયા હતા. જો કે હાલમાં ચારધામ યાત્રા માટેનું રજીસ્ટ્રેશન થોડા સમય માટે બંધ કરી દેવામાં આવ્યું છે. ત્યારે પ્રશ્ન એ થાય છે કે આ યાત્રામાં નોંધણીની મર્યાદા શું છે?

આ વખતે ચારધામ યાત્રા 10મી મેથી શરૂ થઈ છે. આ વખતે ચારધામ યાત્રા માટે લાખો રજીસ્ટ્રેશન થયા છે. જો કે સરકારે આ યાત્રા માટે પહેલાથી જ મહત્તમ નોંધણી મર્યાદા નક્કી કરી હતી. સરકારના કહેવા પ્રમાણે, શ્રદ્ધાળુઓએ દૈનિક મર્યાદા પ્રમાણે જ દર્શન કરવાના હતા.

આટલી બધી અરાજકતા શા માટે અને આખરે સરકારે નક્કી કરેલી ભક્તોની સંખ્યાની મર્યાદા શું હતી? જો સરકાર દ્વારા નક્કી કરવામાં આવેલી મર્યાદાની વાત કરીએ તો યમુનોત્રી માટે ભક્તોની દૈનિક નોંધણીની મર્યાદા 9 હજાર, ગંગોત્રી માટે 11 હજાર, કેદારનાથ માટે 18 હજાર અને બદ્રીનાથ માટે 20 હજાર હતી. જો કે ભક્તોની ભીડને જોતા સરકારે હાલ માટે રજીસ્ટ્રેશન અટકાવી દીધું છે.

હેલિકોપ્ટરનું બુકિંગ થોડા સમયમાં થઈ ગયું ફુલ

ચારધામ યાત્રામાં હેલિકોપ્ટર બુકિંગનો વિકલ્પ પણ છે, જેના દ્વારા ચારધામ યાત્રા સરળતાથી કરી શકાય છે, પરંતુ ચારધામ યાત્રા શરૂ થતાં જ હેલિકોપ્ટરનું બુકિંગ પણ ફુલ થઈ ગયું હતું. આવી સ્થિતિમાં જે લોકો હેલિકોપ્ટર દ્વારા ચારધામ જવાનો વિચાર કરી રહ્યા હતા તેઓએ પણ ચાલવાનો માર્ગ અપનાવવો પડ્યો.