બાંગ્લાદેશના પૂર્વ પીએમને ભારત આવ્યાને લગભગ 48 કલાક થઇ ગયા છે પરંતુ હજુ સુધી તેઓ પોતાના માટે કોઈ સુરક્ષિત જગ્યા શોધી શક્યા નથી. આ કારણે તે ભારતમાં કેટલો સમય રહેશે તે સ્પષ્ટ નથી. અગાઉ એવા સમાચાર આવ્યા હતા કે તે બ્રિટન જવાની તૈયારી કરી રહ્યા છે પરંતુ ત્યાં તેને ના પાડી દેવામાં આવી હતી. રાજદ્વારી નિવેદન આપતાં બ્રિટને કહ્યું કે આશ્રય સંબંધિત આંતરરાષ્ટ્રીય નિયમો કહે છે કે વ્યક્તિ જ્યાં પણ સૌથી ઓહેલા પહોંચે છે, ત્યાં જ તેને આશ્રય માંગવાનો અધિકાર છે. આ સિવાય બ્રિટને રાજકીય હસ્તીઓને આશ્રય આપવાની કોઈ જોગવાઈ હોવાનો પણ ઈન્કાર કર્યો હતો. આ સિવાય તેને અમેરિકા તરફથી પણ રિજેક્શન મળ્યું છે.

દરમિયાન એવી ચર્ચા છે કે શેખ હસીના વિકલ્પો પર વિચાર કરી રહી છે. અહેવાલ મુજબ શેખ હસીના હવે મુસ્લિમ દેશો સાઉદી અરેબિયા અને યુએઈની મુલાકાત લેવાનો પ્રયાસ કરી રહી છે. એટલું જ નહીં તે ફિનલેન્ડને પણ વિકલ્પ તરીકે જોઈ રહી છે. તે તેની નાની બહેન શેખ રિહાન્ના સાથે ભારત આવી હતી અને ત્યારથી તે અહીં જ છે. તેને બુધવારે જ હિંડન એરબેઝમાંથી બહાર કાઢીને સુરક્ષિત જગ્યાએ રાખવામાં આવી હતી પરંતુ હજુ સુધી એ સ્પષ્ટ નથી થયું કે શેખ હસીના ભારતમાં કેટલો સમય રહેશે અને તેની ભવિષ્યની યોજનાઓ શું છે?

તેમના પુત્ર સજીબ વાઝેદ જોયનું કહેવું છે કે અત્યાર સુધી શેખ હસીનાએ કોઈ દેશ પાસે આશ્રય માંગ્યો નથી. તેણીએ કહ્યું કે તે અમેરિકા, યુકે, ફિનલેન્ડ અથવા ભારતમાં રહી શકે છે,  જ્યાં તેના પરિવારના સભ્યો રહે છે. જોયે કહ્યું કે હું વોશિંગ્ટનમાં છું. મારી આંટી લંડનમાં છે અને બહેન દિલ્હીમાં રહે છે. તેથી શેખ હસીના ક્યાં રોકાવાની યોજના બનાવી રહી છે તે હજુ નક્કી નથી. નોંધનીય છે કે શેખ હસીનાને લઈને વિદેશ મંત્રીએ કહ્યું હતું કે તેમણે થોડા સમય માટે દિલ્હીમાં રહેવાની પરવાનગી માંગી હતી. આ માંગ તાત્કાલિક કરવામાં આવી હતી. આ કારણે ભારત સરકારે તેમને સલામત માર્ગ આપ્યો. જોકે તેમણે શેખ હસીનાના ભવિષ્ય વિશે કશું કહ્યું ન હતું.