તાજેતરમાં દેવભૂમિ દ્વારકા ખાતેની બ્રાંચ ઓફિસ યુનિક એસએચસીએસ લી. સામે જીપીઆઈડી એકટ તળે નોંધાયેલ ફરિયાદમાં આરોપીને જામીન મુકત કરવા આદેશ કરવામાં આવેલ છે.

આ અંગેની ફરિયાદ મુજબ વિગતો એવી છે કે, યુનિક SMCS લી. છેલ્લા ૧૦ વરસથી ખંભાળીયા ખાતે બ્રાંચ ચાલે છે અને રોકાણકારો જે રકમની આ કંપનીમાં પોલીસી ખરીદે છે તેઓને લગભગ ૬(છ) વરસમાં બમણી રકમ પરત આપવામાં આવતી હતી. પરંતુ સને ૨૦૨૩-૨૪ માં પાકતી મુદતે કંપનીએ આ રકમ ચુકવવા વિલંબ થતા રોકાણકારો પૈકી કંપનીના એજન્ટે ખંભાળીયા પો. સ્ટેશનમાં કંપનીના માલિક અને મેનેજર સામે જીપીઆઈડી એકટ તળે ફરિયાદ કરેલ હતી.

આ બનાવમાં કંપનીના મેનેજર જોગીન્દર વર્માની ધરપકડ કરતા તેઓએ ખંભાળીયા સ્પેશીયલ કોર્ટ સમક્ષ જામીન અરજી કરેલી અને મુખ્યત્વે એવી રજુઆત કરાયેલ કે આરોપી માત્ર મેનેજર હતા અને તેઓએ રોકાણકારોની રકમમાંથી કોઈ આર્થિક લાભ લીધેલ નોહોતો અને આ કાયદા અનુસાર જે જે પ્રોસીઝર કરવાની થતી હતી તે કોઈ નિયમોનું પાલન કર્યા વગર તદન ખોટી રીતે ધરપકડ કરાયેલ છે.

ઉપરોકત રજુઆતો ધ્યાને લઈ સ્પે. ડેઝીગ્નેટેડ જજશ્રી એસ. વી. વ્યાસ સાહેબે આરોપીને શરતોને આધીન જામીન મુકત કરવા આદેશ કરેલ હતો. આ કેસમાં આરોપી વતી બચાવ પક્ષે વકીલ અશ્વિન બી. મકવાણા અને નેહા બી. દેસાઈ રોકાયા હતા.