અન્ય કારના ચાલકે સાઇડ આપ્યા વિના ટર્ન લેતાં બોલેરો ટકરાઇ

લાખાબાવળના પાટીયા પાસે એક કારના ચાલકે સાઈડ આપ્યા વિના ટર્ન લેતાં પાછળ આવી રહેલી દેવભૂમિ દ્વારકા જિલ્લાની એ.સી.બી.ની સરકારી બોલેરો કાર અકસ્માતે ટકરાઈ ગઈ હતી.
દેવભૂમિ દ્વારકા જિલ્લાના એસીબીના એએસઆઇ નારણભાઈ પરબતભાઈ ગાગીયા કે જેઓ દેવભૂમિ દ્વારકા જિલ્લાની સરકારી બોલેરો કારમાં બેસીને ખંભાળિયાથી જામનગર તરફ આવી રહ્યા હતા, જે દરમિયાન આગળ જઈ રહેલી જી.જે.-૩ એમએચ ૮૨૦૬ નંબરની આર્ટિગા કારના ચાલક રાજકોટના મુકેશભાઈ વિઠ્ઠલભાઈ વાઘેલાએ કોઈપણ પ્રકારની સાઈડ આપ્યા વિના એકાએક ટર્ન લેતાં પાછળથી આવી રહેલી સરકારી બોલેરો ટકરાઈ ગઈ હતી.
 જે અકસ્માતમાં સરકારી બોલેરો ધડાકાભેર અથડાયા પછી રોડથી નીચે ઉતરી ગઈ હતી, અને તેનું ટાયર ફાટી ગયું હતું, જ્યારે બોનેટમાં પણ નુકસાની થઈ હતી. સદભાગ્યે તેમાં બેઠેલા પોલીસ સ્ટાફને કોઈ  ઈજા થઈ ન હતી. પરંતુ આગળ જઈ રહેલી અર્ટિગા કારમાં બેઠેલા એક મહારાષ્ટ્રના યુવાનને ઈજા થઈ હોવાથી જામનગરની સરકારી જી.જી. હોસ્પિટલમાં પ્રાથમિક સારવાર અપાઇ હતી. આ બનાવની જાણ થતા સિકકા પોલીસની ટુકડી દોડી ગઇ હતી, કારચાલક  મુકેશ વાઘેલા સામે ફરીયાદ થતા તેની અટકાયત કરવા કાર્યવાહી આગળ ધપાવવામાં આવી છે.