કાલાવડના જસાપર વાડી વિસ્તારમાં સાસુ સાથે બોલાચાલી થતી હોય જેનું મનમાં લાગી આવતા યુવતિએ ખડમાં છાંટવાની દવા પી લેતા તેણીને સારવાર અર્થે દાખલ કરવામાં આવી છે.

મુળ એમપીના જાંબવા જીલ્લાના વતની અને હાલ કાલાવડના જસાપર ગામમાં રમેશભાઇની વાડીએ રહીને ખેતમજુરી કરતા સીમાબેન વિનોદભાઇ વસુનીયા નામની યુવતિને તેમના સાસુ સાથે ઘરકામ બાબતે અવાર નવાર બોલાચાલી થતી હોય જેથી તેણીને મનમાં લાગી આવતા પોતાની મેળે ત્રણ દિવસ પહેલા ખડમાં છાંટવાની દવા પી લેતા સારવાર માટે ખસેડવામાં આવી છે. જયાં તેણીની સારવાર ચાલી રહી છે.

પુષ્કરધામ સોસાયટીમાંથી મોટરસાયકલની ઉઠાંતરી
જામનગરના રણજીતસાગર રોડ, સરસ્વતી પાર્કમાં રહેતા વિજય કરશનભાઇ રાઠોડ નામના યુવાનની સ્પ્લેન્ડર પ્લસ બાઇક નં. જીજે10ડીકયુ-6429 ગઇકાલે રણજીતસાગર રોડ પર આવેલ પુષ્કરધામ સોસાયટી પાસે રાખ્યુ હતુ ત્યાથી કોઇ અજાણ્યો શખ્સ હંકારી ગયો હતો. આથી વિજયભાઇએ સીટી-એમાં બાઇક ચોરી કરી ગયાની અજાણ્યા શખ્સ સામે ફરીયાદ કરી છે.