ફુલ સ્પીડે બાઈક ચલાવતા સ્લીપ થવાથી એક યુવાનનો ભોગ લેવાયો

જામનગરથી રાજકોટના ઉર્ષના કાર્યક્રમમાં બાઈક પર જઈ રહેલા યુવાનો પૈકી રેસ લગાવી રહેલા જામનગરના એક યુવાનનું બાઇક સ્લીપ થઈ જવાના કારણે ઘટના સ્થળેજ કરુણ મૃત્યુ નીપજયું છે.
જામનગરમાં બેડેશ્વર કાપડ મિલની ચાલી વિસ્તારમાં રહેતો અને સેન્ટીંગ કામની મજૂરી કરતો વિમલ કિશોરભાઈ પરમાર નામનો ૨૮ વર્ષનો યુવાન જામનગરથી રાજકોટના ઉર્ષના કાર્યક્રમમાં હાજરી આપવા માટે તા. ૨૬ના પોતાના ઘેરથી બાઈક લઈને નીકળ્યો હતો. જેની સાથે અન્ય કેટલાક યુવાનો પણ બાઈક સાથે નીકળ્યા હોવાનું જાણવા મળી રહ્યું છે.
 જેઓ ફૂલ સ્પીડમાં બાઈક ચલાવીને રેસ કરી જઈ રહ્યા હતા, જે દરમિયાન વિમલ પરમારનું બાઈક લૈયારા ગામના પાટીયા પાસે સ્લીપ થઈ ગયું હતું, અને તેને ગંભીર ઇજા થવાથી બનાવના સ્થળેજ કમકમાટી ભર્યું મૃત્યુ નીપજ્યું હતું.
 આ બનાવની જાણ થતાં ધ્રોલ પોલીસ સ્ટેશનનો સ્ટાફ ઘટના સ્થળે દોડી ગયો હતો, અને મૃતદેહનો કબજો સંભાળી પોસ્ટમોર્ટમ સહિતની કાર્યવાહી હાથ ધરી હતી. આ અકસ્માતના બનાવ અંગે ધ્રોલ પોલીસે મૃતક વિમલ પરમારના મોટાભાઈ રવિ કિશોરભાઈ પરમારનું નિવેદન નોંધી ધ્રોલ પોલીસમાં મથકમાં મૃતક સામે બેદરકારીપૂર્વક બાઈક ચલાવવા અંગે ગુન્હો નોંધ્યો છે.
 પ્રાથમિક દ્રષ્ટિએ જામનગરથી નીકળેલા યુવાનો બાઈકમાં રેસ લગાવી રહ્યા હોવાનું કેટલાક લોકો મારફતે જાણવા મળ્યું હતું, તે દિશામાં પોલીસ તપાસ ચલાવી રહી છે. હાલ તેની સાથે બાઈક પર નીકળેલા અન્ય કોઈનો સંપર્ક થઈ શક્યો નથી.