ભાણવડમાં પંચવટી વિસ્તારમાં રહેતા ધવલભાઈ નાજાભાઈ વીંઝવા નામના 30 વર્ષના યુવાન ઋષિ કોમ્પલેક્ષમાં આવેલી જોકર પાનની દુકાન પાસે હતા અને અન્ય એક યુવાન સાથે પૈસાની લેતી દેતી અંગેની વાતચીત કરી રહ્યા હતા. ત્યારે અહીં મોટા કાલાવડ ગામનો હાર્દિક વેજાભાઈ કનારા નામનો આહીર યુવાન તેમની પાસે આવ્યો હતો અને પૈસાની વ્યવહારિક લેતી દેતી બાબતે વાત આગળ વધતા આરોપી હાર્દિકએ ધવલભાઈ ઉપર છરી વડે હુમલો કરતા તેમને ખભા તથા હાથ ઉપર છરીના ઘા વાગ્યા હતા.

આ રીતે આરોપી હાર્દિક દ્વારા જાનથી મારી નાખવાના ઇરાદે છરી વડે જીવલેણ હુમલો કરવા સબબ ભાણવડ પોલીસે ધવલભાઈ નાજાભાઈની ફરિયાદ પરથી હાર્દિક વેજાભાઈ સામે બી.એન.એસ. તથા જી.પી. એક્ટની કલમ હેઠળ ગુનો નોંધી, આગળની તપાસ ડીવાયએસપી સાગર રાઠોડના વડપણ હેઠળ હાથ ધરવામાં આવી છે.

"અમારી વિરુદ્ધ ફરિયાદ કેમ કરો છો" કહીને આથમણા બારાના બુઝુર્ગ પર હુમલો

ખંભાળિયા તાલુકાના આથમણા બારા ગામે રહેતા જેઠીજી વર્ષાજી જાડેજા નામના 66 વર્ષના વૃદ્ધ તેમની વાડીએ હતા. ત્યારે વચલા બારા ગામના રાયમલ રબારી અને તેના પુત્ર સામતએ તેમની પાસે આવી અને "તમે અમારી વિરુદ્ધ કેમ ફરિયાદ કરો છો...?" તેમ કહીને ધોકા વડે હુમલો કરતા આ બનાવ અંગે બન્ને શખ્સો સામે સલાયા મરીન પોલીસ મથકમાં ગુનો નોંધાયો છે.

દ્વારકાનો શખ્સ વિદેશી દારૂ સાથે ઝડપાયો

દ્વારકાના બિરલા પ્લોટ વિસ્તારમાં રહેતા ગૌરવ કિરીટભાઈ હેરમા નામના 37 વર્ષના શખ્સને પોલીસે રૂપિયા 2,700 ની કિંમત ની વિદેશી દારૂની 15 બોટલ સાથે ઝડપી લઇ, જરૂરી કાર્યવાહી કરી હતી.