સારવારમાં દમ તોડયો : પરિવારમાં શોકની લાગણી

જામનગર નજીક આમરા વાડી વિસ્તારમાં વાડીએ કુવાની મોટરમાંથી વિજશોક લાગતા યુવાનનું સારવાર દરમ્યાન મૃત્યુ નિપજયું છે.

આમરા ગામ વાડી વિસ્તારમાં રહેતા ભગવાનજીભાઇ હરજીભાઇ સોનગરા (ઉ.વ.41) નામના યુવાન ગત તા. 13ના રોજ પોતાની વાડીએ હતા ત્યારે કુવાની મોટરમાંથી ઇલેકટ્રીક શોક લાગતા બેભાન અવસ્થામાં જી.જી. હોસ્પીટલમાં લઇ જવામાં આવેલ જયાં સારવાર દરમ્યાન તેમનું મૃત્યુ નિપજયુ હતું.

આ બનાવ અંગે આમરા ગામમાં રહેતા વસંત રમેશભાઇ સોનગરા દ્વારા સિકકા પોલીસમાં જાણ કરવામાં આવતા પોલીસ દ્વારા વિગતોના આધારે આગળની કાર્યવાહી હાથ ધરવામાં આવી હતી, મૃત્યુના બનાવથી પરિવારમાં શોકની લાગણી ફેલાઇ ગઇ હતી.