શહેરમાં આત્મહત્યાના બનાવનો સિલસિલો યથાવત રહ્યો છે. ભોમેશ્વરવાડીમાં રહેતી યુવતીએ ગળેફાંસો ખાઈ અને જુના મોરબી રોડ પર સેટેલાઇટ ચોક પાસે રહેતા યુવકે ઝેરી ટીકડા પી આપઘાત કરી લીધાનો બનાવ પોલીસ ચોપડે નોંધાયો છે.
બનાવની મળતી વિગત મુજબ જુના મોરબી રોડ ઉપર સેટેલાઈટ ચોકમાં રહેતા અમિતભાઈ ગોરધનભાઈ ગોંડલીયા (ઉ.વ.37)નામના યુવકે રાત્રીના નવેક વાગ્યાના અરસામાં ઘઉંમાં નાખવાના ઝેરી ટીકડા પી લેતા બેભાન હાલતમાં સિવિલ હોસ્પિટલમાં ખસેડવામાં આવતા ટૂંકી સારવાર દરમિયાન મોત નીપજ્યું હતું. બનાવ અંગે હોસ્પિટલ ચોકીના સ્ટાફે આ અંગે સિવિલ હોસ્પિટલ પોલીસ ચોકીના સ્ટાફે બી ડિવિઝન પોલીસને જાણ કરતા પોલીસ સ્ટાફે હોસ્પિટલ પહોંચી જરૂરી કાર્યવાહી કરી હતી.
યુવક બે ભાઈ એક બહેનમાં મોટો હતો અને ડ્રાઇવિંગ કામ કરતો હતો. પરિવારના જણાવ્યા મુજબ અમિતના છૂટાછેડા થઇ ગયા છે અને હેતલ નામની યુવતી પ્રેમ સબંધ હોવાથી બંને ત્રણ વર્ષથી મૈત્રી કરાર કરીને સાથે રહેતા હતા પરંતુ બંને વચ્ચે નાની નાની બાબતે ઝગડા થતા હોવાથી પ્રેમિકાના ત્રાસથી કંટાળી પગલું ભરી લીધું હતું,. વધુ તપાસ બી ડિવિઝન પોલીસે હાથ ધરી છે. યુવકના મોતથી પરિવારમાં કલ્પાંત સર્જાયો છે.
બીજા બનાવમાં જામનગર રોડ પર ભોમેશ્વર વાડીમાં રહેતી સિમરન શેરમહમદભાઈ પઠાણ (ઉ.વ.27) નામની યુવતિ સાંજે સાતેક વાગ્યે ઘરે હતી ત્યારે પંખાના હૂંકમાં દોરી બાંધી ગળેફાંસો ખાઈ લેતા બેભાન હાલતમાં સિવિલએ ખસેડવામાં આવતા ફરજ પરના તબીબે જોઈ તપાસી મૃત જાહેર કરતા પરિવારમાં કલ્પાંત સર્જાયો હતો. બનાવ અંગે હોસ્પિટલ ચોકીના સ્ટાફે પ્ર.નગર પોલીસને જાણ કરતા પોલીસે હોસ્પિટલ પહોંચી જરૂરી કાર્યવાહી કરી આપઘાતનું કારણ જાણવા તપાસ હાથ ધરી છે. મૃતક સિમરન બે ભાઈ એક બહેનમાં વચેટ હતી. પુત્રીના મોતથી પરિવારમાં માતમ છવાયો છે.