રાજકોટ જિલ્લામાં મતદાન અંગે જાગૃતિ લાવવા અનોખો પ્રયાસ હાથ ધરવામાં આવ્યો છે. જસદણ મત વિસ્તારમાં સરકારી કાગળ પર "ચુનાવ કા પર્વ, દેશ કા ગર્વ" સ્ટેમ્પ થકી મતદાન જાગૃતિ સંદેશ લગાવવામાં આવ્યો છે.

રાજકોટ જિલ્લા કલેકટર અને મુખ્ય ચૂંટણી અધિકારી પ્રભવ જોષીના નેતૃત્વમાં તેમજ અધિક જિલ્લા ચૂંટણી અધિકારી એન. કે. મુછારના દિશાનિર્દેશ મુજબ લોકસભા સામાન્ય ચૂંટણી-૨૦૨૪ને ધ્યાને લઈને સમગ્ર ચૂંટણી તંત્ર સતત કાર્યરત છે, ત્યારે અધિક જિલ્લા કલેક્ટર અને નોડલ ઓફિસર જિજ્ઞાસાબેન ગઢવીના માર્ગદર્શન હેઠળ સ્વીપ (સિસ્ટમેટિક વોટર્સ એજ્યુકેશન એન્ડ ઇલેક્ટ્રોલ પાર્ટીશીપેશન) અંતર્ગત મતદાન જાગૃતિ ઝુંબેશ ચાલી રહી છે. જસદણ વિધાનસભા મત વિસ્તારમાં પણ નાગરિકોને મતદાન માટે જાગૃત કરવા વિવિધ પ્રવૃત્તિઓ કરવામાં આવી રહી છે.

૭૨ -જસદણ વિધાનસભા મતદાર વિભાગમાં મદદનીશ ચૂંટણી અધિકારી અને પ્રાંત અધિકારી ગ્રીષ્માબેન રાઠવાના વડપણ હેઠળ મતદાનનો સંદેશો જન-જન સુધી પહોંચાડવા નવતર પહેલ હાથ ધરવામાં આવી છે. જેમાં તમામ વહીવટી કાગળ ઉપર 'ચુનાવ કા પર્વ, દેશ કા ગર્વ'નો સ્ટેમ્પ લગાવવામાં આવે છે. તેમજ લાયબ્રેરી, ટેક્ષેશન, માર્કેટ યાર્ડ, કૃષિ, મેડીકલ, કરીયાણા, વાજબી ભાવની દુકાન સહિતના સ્થળોએ પણ આ સ્ટેમ્પનો ઉપયોગ કરવા સૂચના આપવામાં આવી છે. જેથી, આ સ્ટેમ્પ બહોળા પ્રમાણમાં લોકો સુધી પહોંચે અને તેમને મતદાન કરવા પ્રેરિત કરી શકાય.

આ સ્ટેમ્પમાં 'ચુનાવ કા પર્વ, દેશ કા ગર્વ' સૂત્રની સાથે '૭મી મે, ૨૦૨૪ના દિવસે રાજકોટ અવશ્ય મતદાન કરશે.' - નો સંદેશો આપવામાં આવ્યો છે. આમ મતદાર જાગૃતિ સ્ટેમ્પનો ઉપયોગ કરીને લોકશાહીના પર્વ ચૂંટણીમાં મહત્તમ મતદારોને સહભાગી બનાવવાનો પ્રયાસ કરવામાં આવી રહ્યો છે.