કોલકાતાની આરજી કર મેડિકલ કોલેજમાં વિરોધ કરી રહેલા તબીબોમાં અચાનક હંગામો મચી ગયો હતો. કારણ કે, સ્થળ પરથી એક શંકાસ્પદ બેગ મળી આવી હતી. આ દરમિયાન બેગમાં બોમ્બ હોવાની અફવા ફેલાઈ હતી. ત્યારબાદ પોલીસ અને ડોગ સ્ક્વોડની ટીમને જાણ કરતા સ્થળ પર પહોંચી હતી,  બેગની તપાસ કરી હતી. આ સમયે બોમ્બ ડિસ્પોઝલ સ્ક્વોડ પણ ઘટનાસ્થળે પહોંચી હતી.

શું હતું બેગની અંદર

તલાશી બાદ જ્યારે બેગ ખોલવામાં આવી તો તેમાં બોમ્બ ન હતો. પરંતુ બેગમાં કેટલીક ખાદ્ય સામગ્રી અને અન્ય વસ્તુઓ હતી. તપાસ દરમિયાન બેગમાંથી ઠંડા પાણીની બોટલ, ત્રિરંગા મસાલાના બે પેકેટ, કેટલાક કાગળો અને ફળો મળી આવ્યા હતા. આ બેગમાં કેટલાક દસ્તાવેજો પણ હતા. જોકે, બેગમાં કોઈ વિસ્ફોટક પદાર્થ નહોતો.

9મી ઓગસ્ટની રાત્રે ટ્રેઇની તબીબ પર ગુજારવામાં આવ્યો હતો અત્યાચાર

9 ઓગસ્ટના રોજ હોસ્પિટલ પરિસરમાં એક ટ્રેઇની ડોક્ટર પર બળાત્કાર થયો હતો. આ પછી ડોક્ટરનું મોત થયું હતું. આરજી કર મેડિકલ કોલેજમાં મૃતક તાલીમાર્થી ડૉક્ટરને ન્યાય મળે અને ડૉક્ટરોની સુરક્ષા માટે કાયદો બનાવવાની માગણી સાથે વિરોધ પ્રદર્શન ચાલુ છે.