વાહનમાં આવેલા બે અજાણ્યા શખ્સનું કારસ્તાન : સીસી ફુટેજ ચેક કરતી પોલીસ

જામનગર શહેરમાં મોબાઇલ ચોરીના બનાવો વધી રહયા છે દરમ્યાનમાં ખોડીયાર કોલોની ૮૦ ફુટ રોડ પર ચાલીને જઇ રહેલી વિધાર્થીનીના હાથમાથી ૧૨ હજારની કિંમતનો મોબાઇલ ઝુંટવીને નાશી છુટયાનો બનાવ સામે આવતા ચકચાર વ્યાપી છે આ અંગે બે શખ્સ સામે ફરીયાદ કરવામાં આવતા પોલીસ દ્વારા સીસી ફુટેજ ચેક કરવા સહિતની તપાસ લંબાવવામાં આવી છે.
જામનગરના કોમલનગર શેરી નં. ૨માં રહેતી અંકીતાબેન અશોકભાઇ ચોપડા (ઉ.વ.૨૦) નામની વિધાર્થીની તા. ૩૧ના રોજ ખોડીયાર કોલોની ૮૦ ફુટ રોડ, મંદિર નજીક માર્ગ પરથી ચાલીને જતી હતી ત્યારે પાછળથી બે અજાણ્યા શખ્સો વાહનમાં આવીને તેના હાથમાં રહેલો રુા. ૧૨ હજારની કિંમતનો રીયલમી કંપનીનો ડબલસીમવાળો મોબાઇલ ફોન ઝુંટવીને નાશી ગયા હતા.
અંકીતાબેન દ્વારા આ બનાવ અંગે ગઇકાલે સીટી-સી ડીવીઝનમાં બે અજાણ્યા ઇસમો વિરુઘ્ધ ફરીયાદ કરવામાં આવતા પોલીસ દ્વારા આજુબાજુના નજીકના સીસી ફુટેજ ચેક કરવા સહિતની તપાસ ચલાવવામાં આવી છે.