મુકેશ અંબાણીની કંપની રિલાયન્સ ઈન્ડસ્ટ્રીઝના શેરમાં આજે મોટો ઘટાડો જોવા મળી રહ્યો છે. દેશની સૌથી મોટી કંપનીના શેરમાં ભારે ઘટાડાથી શેરબજારનું વલણ બદલાયું અને થોડી જ વારમાં મોટો ઘટાડો થયો. બપોરે 1:50 કલાકે, BSE સેન્સેક્સ 1100 પોઈન્ટ અથવા 1:30 ટકાના ઘટાડા સાથે 84,465.69 પર ટ્રેડ કરી રહ્યો હતો. જ્યારે નિફ્ટી 318.35 પોઈન્ટ અથવા 1.22% ના ઘટાડા સાથે 25,860.60 પર ટ્રેડ કરી રહ્યો હતો. આ સિવાય બાકીના સૂચકાંકો લાલ નિશાન પર હતા.

સોમવારે રિલાયન્સ ઇન્ડસ્ટ્રીઝનો શેર 3.07 ટકા ઘટીને રૂ. 2958.65 પ્રતિ શેર પર ટ્રેડ થઈ રહ્યો હતો. છેલ્લા પાંચ દિવસમાં આ સ્ટોક 0.83% ઘટ્યો છે, જ્યારે એક મહિનામાં આ સ્ટોક 2.02% ઘટ્યો છે. આ શેરે છ મહિનામાં માત્ર 0.5 ટકા વળતર આપ્યું છે. સોમવારે RILમાં મોટા ઘટાડાથી સેન્સેક્સ અને નિફ્ટી દબાણમાં આવી ગયા, કારણ કે આ કંપની માર્કેટ કેપિટલની દ્રષ્ટિએ ભારતની સૌથી મોટી કંપની છે, જેની માર્કેટ કેપ રૂ. 19.31 લાખ કરોડ છે.

આ કારણે રિલાયન્સ ઇન્ડસ્ટ્રીઝના શેરમાં થયો ઘટાડો

રિલાયન્સ ઇન્ડસ્ટ્રીઝના શેરનું 52-સપ્તાહનું ઉચ્ચ સ્તર રૂ. 3,217.60 છે, જ્યારે આ શેરનું 52-સપ્તાહનું નીચું સ્તર રૂ. 2,220.30 છે. રિલાયન્સ ઇન્ડસ્ટ્રીઝના શેરે એક વર્ષમાં 27.52% વળતર આપ્યું છે. આજે રિલાયન્સ ઈન્ડસ્ટ્રીઝના શેરમાં ઘટાડાનું મુખ્ય કારણ પ્રોફિટ બુકિંગ હોવાનું કહેવાય છે. પ્રોફિટ બુકિંગના કારણે રિલાયન્સ ઈન્ડસ્ટ્રીઝના શેર પર દબાણ જોવા મળ્યું, જેના કારણે આ શેર 3 ટકા ઘટ્યો.

આ હેવીવેઇટ શેર્સ પણ ઘટ્યા

રિલાયન્સ ઈન્ડસ્ટ્રીઝ ઉપરાંત, આઈસીઆઈસીઆઈ બેંક, ટેક મહિન્દ્રા, એક્સિસ બેંક, એચડીએફસી બેંક અને એસબીઆઈ જેવા હેવીવેઈટ શેરોમાં પણ 3 ટકા સુધીનો ઘટાડો થયો છે. BSE સેન્સેક્સના ટોચના 30 શેરોમાંથી, 25 ભારે દબાણ હેઠળ ટ્રેડ થઈ રહ્યા હતા, જેમાં રિલાયન્સ ઈન્ડસ્ટ્રીઝના શેર સૌથી વધુ ઘટ્યા હતા.

જાપાનના શેરબજારમાં પણ હોબાળો

ભારતીય શેરબજારમાં આ મોટા ઘટાડાનાં સંકેતો પહેલેથી જ દેખાઈ રહ્યાં હતાં. ત્યારે જાપાનના કારણે વૈશ્વિક સૂચકાંકો સુસ્ત દેખાઈ રહ્યા હતા. અને બજાર ખુલ્યું ત્યારે તેની અસર સ્પષ્ટ દેખાઈ રહી હતી. જો વૈશ્વિક બજારની વાત કરીએ તો જાપાનના શેરબજારમાં ઘટાડો જોવા મળ્યો હતો અને નિક્કી ઇન્ડેક્સ 4 ટકા ઘટ્યો હતો. જાપાનના શેરબજારમાં ઘટાડા પાછળ ચાલી રહેલી રાજકીય ઉથલપાથલની મોટી ભૂમિકા ગણી શકાય. જાપાનના શાસક લિબરલ ડેમોક્રેટ્સે ભૂતપૂર્વ સંરક્ષણ પ્રધાન શિગેરુ ઇશિબાને આગામી વડા પ્રધાન (જાપાન નવા પીએમ) તરીકે ચૂંટ્યા છે, તેઓ વર્તમાન વડા પ્રધાન ફ્યુમિયો કિશિદાનું સ્થાન લેશે, જેમણે રાજીનામું આપ્યું છે.