જામનગરમાં વિદેશી દારુની બોટલો સાથે એક ઝબ્બે : ૩ ફરાર

April 12, 2025 12:14 PM

દરબારગઢ સર્કલ પાસે ટ્રાવેલ્સના ધંધાર્થી બાટલી સાથે મળી આવ્યો : દરેડમાં ૩૦ બોટલ સાથે એકની અટક

જામનગરની એસટી બસ સ્ટેન્ડ રોડ પર એક બાતમીના આધારે એલસીબીની ટુકડીએ એક શખ્સને દારુની ૩૦ બોટલ અને મોબાઇલ સાથે દબોચી લીધો હતો જેની પુછપરછમાં દારુ કોના કહેવાથી, કોની પાસેથી અને કોને આપવાનો હતો એ સહિતની વિગતો પોલીસે ખોલાવી હતી, આમ કુલ ચાર સામે પ્રોહી મુજબ ફરીયાદ દાખલ કરીને તપાસને આ દીશામાં આગળ ધપાવી છે. ઉપરાંત દરબારગઢ સર્કલ પાસે ટ્રાવેલીંગનો ધંધાર્થી દારુની બાટલી સાથે ઝપટમાં આવ્યો હતો અને દરેડ નદી પુલ પાસે પરપ્રાંતીય શખ્સને શરાબની ૩૦ બોટલ સાથે દબોચી લેવાયો હતો.

જામનગર જીલ્લા પોલીસવડા પ્રેમસુખ ડેલુએ જીલ્લામાંથી દારુ-જુગારની બદી નેસ્ત નાબુદ કરવા સુચના કરતા એલસીબી પીઆઇ વી.એમ. લગારીયાના માર્ગદર્શન મુજબ પીએસઆઇ મોરી તથા પીએસઆઇ કાંટેલીયા તથા સ્ટાફના માણસો શહેર પોલીસ સ્ટેશન વિસ્તારમાં પેટ્રોલીંગમાં હતા.

દરમ્યાન એલસીબી સ્ટાફના સુમીતભાઇ શીયાર તથા કિશોરભાઇ પરમારને મળેલ ખાનગી હકીકત આધારે શહેરના પ્રદર્શન ગ્રાઉન્ડ પાસે નવા બસ સ્ટેશનની બાજુમા મીગ કોલોની તરફ જતા રોડ પર સુમીત સુનિલ મંદીયાણી (ઉ.વ.૨૦) રહે. જડેશ્ર્વર પાર્ક શેરી નં. ૨, રણજીતસાગર રોડ, જામનગર હાલ ગાયકવાડી શેરી નં. ૭/૯ રેલ્વે સ્ટેશન પાસે રાજકોટવાળાને ભારતીય બનાવટના વિદેશી દારુની ૩૦ બોટલ કિ. ૧૨.૦૦૦ તથા મોબાઇલ કિ. ૫૦૦૦ મળી કુલ ૧૭ હજારના મુદામાલ સાથે રેઇડ દરમ્યાન મળી આવતા કાયદેસરની કાર્યવાહી હતી.

આ દારુનો જથ્થો પોતે દિપક ભટી રહે. બાઇની વાડી ચુનાના ભઠા પાસે જામનગરવાળાના કહેવાથી ભાવેશ ભરત સવાસરીયા રહે. દડીયાવાળો આપી ગયેલ અને દારુનો જથ્થો ઉદય ગંઢા રહે. જામનગરવાળાને આપવાનો હોવાનું જણાવ્યુ હતું.

અન્ય દરોડામાં ખંભાળીયા ગેઇટ પાસે સોની સમાજની વાડી સામે રહેતા ટ્રાવેલીંગના ધંધાર્થી કેતન હરીશ બદીયાણી નામના શખ્સને વિદેશી દારુની એક બોટલ લઇને દરબારગઢ સર્કલ પાસેથી નીકળતા સીટી-એ પોલીસે પકડી લીધો હતો જયારે એમપીના ગંધવાનીના મોહનપુરા ગામના ગજેન્દ્ર ગુલાબસિંહ ડોડવે નામના શખ્સને ઇંગ્લીશ દારુની ૩૦ બોટલ સાથે દરેડ રંગમતી નદી પર બનેલા યુનીટી પુલ પાસેથી પંચ-બી પોલીસે પકડી લીધો હતો અને તેની પુછપરછ હાથ ધરી હતી.

આ ઉપરાંત ધ્રોલના હમાપર ગામમાં રહેતી કમુબેન દિનેશ વાઘેલાની પાસેથી સ્થાનીક પોલીસે એક લીટર દેશી દારુ કબ્જે કર્યો હતો.

લાઈક અને ફોલો કરો અમારું ફેસબુક પેજ FACEBOOK - AAJKAALDAILY

ફોલો કરો અમારું ઇન્સ્ટાગ્રામ INSTAGRAM - AAJKAALDAILY

સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં 99251 12230

View News On Application