કાલાવડ રોડ પર મેટોડા જીઆઇડીસીમાં રહેતા રિક્ષા ચાલક આધેડે પોલીસના ત્રાસથી વીડિયો બનાવી ઝેરી દવા પી લેતા તેને સારવાર માટે સિવિલ હોસ્પિટલમાં ખસેડવામાં આવ્યા છે. અગાઉ તેની રિક્ષા પોલીસે પકડેલી હોય જેમાં પોલીસ તોડફોડ કર્યા અંગેની અરજી કરતા પોલીસ માનસિક ત્રાસ આપતી હોવાનો આક્ષેપ કરવામાં આવ્યો છે.

રિક્ષા પોલીસે જુગારના કેસમાં પકડી હતી

જાણવા મળતી વિગત મુજબ મેટોડા જીઆઇડીસીમાં અજંલી પાર્કમાં રહેતા કાંતીભાઇ અરજણભાઇ દાફડા (ઉં.વ. 54) નામના રિક્ષાચાલક પ્રૌઢે આજે સવારે પોતાના ઘરે મોબાઇલમાં વીડિયો બનાવી બાદમાં ઝેરી દવા પી લેતા તેમને સારવાર માટે સિવિલ હોસ્ટિપલમાં ખસેડવામાં આવ્યા છે. આધેડે આપઘાતનો પ્રયાસ કરતા પૂર્વ બનાવેલા વીડિયોમાં આક્ષેપ કરવામાં આવ્યો છે કે, અગાઉ તેની રિક્ષા પોલીસે જુગારના કેસમાં પકડેલી હોય જે રિક્ષામાં પોલીસે તોડફોડ કરી હોવાથી પોલીસમાં જાણ કરતા કોઈ જવાબ દેવામાં આવ્યો ન હતો. જેથી તેમણે જિલ્લા પોલીસ વડાને અરજી કરી હતી. જેનો ખાર રાખી પોલીસ દ્વારા તેમનુ જ્ઞાતિ પ્રત્યે હડધૂત કરી ત્રાસ આપવામાં આવતો હોવાથી કંટાળી તેમણે આ પગલુ ભરી લીધાનું જાણવા મળ્યું છે. આ અંગે પોલીસે વધુ તપાસ હાથ ધરી છે.