રાજકોટ, લોધિકા અને પડધરી તાલુકાના 180 ગામોનું વિશાળ કાર્યક્ષેત્ર ધરાવતા રાજકોટના બેડી માર્કેટ યાર્ડમાં આજે નવા ચણાની પુષ્કળ આવક નોંધાઇ હતી. છેલ્લા એક દાયકામાં રાજકોટ યાર્ડમાં ચણાનું બજાર વિકસ્યું છે. ચણા ઉપરાંત નવા ધાણા, ધાણી, જીરૂ અને ઘઉંની આવક પણ નોંધાઇ છે. વિશેષમાં વેપારી સૂત્રોએ જણાવ્યું હતું કે છેલ્લા એક સપ્તાહથી મગફળી અને કપાસની આવક ઘટવા લાગી છે. જ્યારે નવા ચણા, તુવેર, ધાણા, ધાણી, જીરૂ તેમજ ઘઉંની આવક વધવા લાગી છે. દરમિયાન આજે નવા ધાણા અને ધાણીની 2500 ગુણીની આવક સામે ધાણીનો ભાવ રૂ.1400 અને ધાણાનો ભાવ રૂ.1000, નવા જીરૂની 1000 ગુણીની આવક સામે ભાવ રૂ.5000થી 7500 સુધી રહ્યો હતો. નવા ચણાના 20 હજાર બાચકા અને નવી તુવેરના 15000 બાચકાની આવક નોંધાઇ હતી. ઘઉંમાં નવી આવકો શરૂ થઇ ચુકી છે પરંતુ હજુ જોઈએ તેવી આવક નથી, આ વર્ષે જોઇએ તેવી ઠંડી પડી ન હોય ઘઉંના પાકમાં હજુ જોઇએ તેવી જમાવટ થઇ નથી. કપાસની આવક ઘટીને 18 હજારથી 19 હજાર મણ જેવી થઇ ગઇ છે.