સર્વેશ્વર ચોક નજીક આવેલા ડી-9 સ્પાના ટેબલ પર રાખવામાં આવેલા બે મોબાઈલની ઉઠાંતરી કરનાર કોઠારીયા રોડ પર રહેતા શખસને બી ડિવિઝન પોલીસે ટેક્નિકલ સોર્સની મદદથી હોસ્પિટલ ચોક પાસેથી પકડી લઇ ચોરીના બે મોબાઈલ કબ્જે કરી ગુનાનો ભેદ ઉકેલ્યો છે.

પોલીસ સૂત્રોમાં નોંધાયેલી વિગત મુજબ સાધુવાસવાણી રોડ પર ગોપાલ ચોક નજીક પાવન એપાર્ટમેન્ટમાં રહેતા અને સર્વેશ્વર ચોકમાં ડી-9 સ્પામાં મેનેજર તરીકે નોકરી કરતા સિધ્ધાર્થભાઈ રવજીભાઈ પારિયા તા.17ના સ્પામાં નોકરીએ હતા ત્યારે ટેબલ પર બે મોબાઈલ ફોન રાખી નીચે ચા પીવા માટે ગયા હતા પરત આવતા ટેબલ પર રાખવામાં આવેલા મોબાઈલ ફોન જોવા ન મળતા કોઈ અજાણ્યાઓ શખ્સ ચોરી કરી ગયાનું જણાતા એ ડિવિઝન પોલીસ મથકમાં ફરિયાદ નોંધાવી હતી. જે ફરિયાદના આધારે એ ડિવિઝન પોલીસ મથકના પીઆઈ આર.જી.બારોટની સૂચનાથી પીએસઆઈ કે.એમ.વડનગરા સહિતની ટીમે ચોરીનો ગુનો ડિટેકટ કરવા હ્યુમન સોર્સ અને ટેક્નિકલ સોર્સથી તપાસ હાથ ધરી હતી. દરમિયાન પો.હેડ.કોન્સ.કલ્પેશભાઈ બોરીચા અને સાગરભાઈ માવદીયાએ સંયુક્ત હકીકત મળી હતી કે, હોસ્પિટલ ચોક ઓવરબ્રીજ પાસે શોચાલય પાસે ઉભેલો શખસ મોબાઈલ ચોરીમાં સંડોવાયેલો છે. આથી ટેક્નિકલ માધ્યમથી શખ્સને રોકી પુછપરછ કરતા પોતાનું નામ તેજસ અમિતભાઇ પટેલ (રહે-ન્યુ.સાગર સોસાયટી, શેરી નં-1, કોઠારીયા રોડ) હોવાનું જણાવતા તેની ઝડતી દરમિયાન રિયલમી અને પ્રો મેક્સ કંપનીના મોબાઈલ મળી આવતા શખ્સની યુક્તિ પ્રયુક્તિથી પુછપરછ કરાતા પોતે બંને ફોન સ્પાના ટેબલ પરથી ચોરી કરી હોવાની કબૂલાત આપી હતી. શખ્સની અટકાયત કરી પોલીસે મોબાઈલ ચોરીનો ભેદ ઉકેલી આગળની તપાસ હાથ ધરી છે.