બોલીવૂડની સ્પેશિયલ 26 ફિલ્મ જેવી ઘટના દાહોદ જિલ્લામાં બની છે. ફતેપુરા તાલુકાના સુખસર ગામમાં ઇન્કમટેક્સના નામે 6 નકલી અધિકારી બની લાયસન્સધારી વેપારીને ત્યાં દરોડો પાડ્યો હતો. બાદમાં આ નકલી અધિકારીઓએ વેપારીને મામલો રફેદફે કરવા 25 લાખની માગણી કરી હતી. આથી વેપારી ડરી ગયા હતા અને 2 લાખ તો આપી પણ દીધા હતા. 

આ ઘટના બાદ વેપારીને શંકા ગઈ હતી. વેપારીને નકલી ઇન્કમટેક્સના લોકો હોવાનું જણાતા તાત્કાલિક નજીકના પોલીસ સ્ટેશને ફરિયાદ નોંધાવી હતી. પોલીસે 2 શખસની ધરપકડ કરી લીધી છે જ્યારે અન્યોની શોધખોળ હાથ ધરી છે. 

પ્રાપ્ત વિગત મુજબ, સુખસરમાં પોતાના જ વિસ્તારમાં લાયસન્સથી નાણાં ધીરધારનો વેપાર કરતાં અલ્પેશભાઈ ઉકારભાઈ પ્રજાપતિની દુકાનમાં ગત તા.10મી જાન્યુઆરીના રોજ બપોરના 2 વાગ્યાના આસપાસ 6 જેટલા નકલી ઈન્કમટેક્ષ ઓફિસર બની આવ્યા હતા. આ નકલી અધિકારીઓ વેપારીને કહેવા લાગ્યા કે, અમે ઈન્કમટેક્સ ઓફિસર છીએ, તમારી દુકાન અને ઘર સર્ચ કરવાનું છે, તમારી વિરૂદ્ધ અરજી આવેલી છે. બાદમાં આ શખસોએ દુકાનમાં મુકી રાખેલા દાગીના તપાસ કરવા લાગ્યા હતાં.

આ દરમિયાન નકલી ઈન્કમટેક્સ ઓફિસર બનીને આવેલા શખસોએ દાગીના જપ્ત નહીં કરવા રૂપિયા 25 લાખની માંગણી કરી હતી, પરંતુ અલ્પેશભાઈએ પોતાની પાસે આટલા નાંણા ન હોવાનું જણાવી પોતાની પાસે રહેલા 2 લાખ રોકડા નકલી ઈન્મટેક્સ બનીને આવેલા શખસોને આપી દીધાં હતાં.

ચાર શખસ હજુ  ફરાર
બાદમાં અલ્પેશભાઈ પર પોતાના સંબંધીનો ફોન આવ્યો હતો. તેઓએ જણાવ્યું હતું કે, તમારી દુકાને જે માણસો આવેલા છે તે નકલી ઈન્કમટેક્સના માણસો છે. જેથી અલ્પેશભાઈ સુખસર પોલીસ મથકે ફરિયાદ આપવા પહોંચી ગયાં હતાં. સુખસર પોલીસે તપાસનો ધમધમાટ આરંભ કરી નકલી ઈન્કમટેક્સ ઓફિસર બનીને આવેલા 6 પૈકી ભાવેશ બીપીનચંદ્ર આચાર્ય અને અબ્દુલ સુલેમાનને ઝડપી પાડ્યાં હતાં.