​​​​​​​સિદ્ધાર્થ મલ્હોત્રાની ફૅન ફૉલોઈંગ દેશમાં જ નહીં વિદેશમાં પણ છે. લોકો અભિનેતાના દિવાના છે. ફેન્સ તેના માટે કંઈ પણ કરવા તૈયાર છે. આવું જ એક કૌભાંડ એક ચાહક સાથે થયું છે. સિદ્ધાર્થના નામે ચાહક સાથે 50 લાખની છેતરપિંડી થઈ હતી. સિદ્ધાર્થના એક પ્રશંસકે સોશિયલ મીડિયા પર આ માહિતી આપી છે. પોસ્ટ શેર કરીને તેણે જણાવ્યું કે કેવી રીતે બે છોકરીઓએ સિદ્ધાર્થનો જીવ જોખમમાં હોવાનું કહીને 50 લાખ રૂપિયાની છેતરપિંડી કરી.

સિદ્ધાર્થના જે ફેન સાથે છેતરપિંડી થઇ હતી તેનું નામ મીનુ વાસુદેવ છે અને તે અમેરિકામાં રહે છે. મીનુએ સોશિયલ મીડિયા પર એક પોસ્ટ શેર કરીને તેની આપવીતી વર્ણવી છે. મીનુએ જણાવ્યું કે અલીજા અને હુસ્ના નામની બે છોકરીઓએ સિદ્ધાર્થ અને કિયારાનું નામ લઈને તેની સાથે છેતરપિંડી કરી હતી.

કિયારાએ કર્યો કાળો જાદુ

મીનુએ પોતાની પોસ્ટમાં લખ્યું- અલીજાએ તેને કહ્યું હતું કે કિયારાને કારણે સિદનો જીવ જોખમમાં છે. તેણે સિદને ધમકી આપીને લગ્ન કર્યા છે. કિયારાએ સિદ્ધાર્થને ધમકી આપી હતી કે જો તે તેની સાથે લગ્ન નહીં કરે તો તે તેના પરિવારને મારી નાખશે. તેણે એમ પણ કહ્યું કે કિયારાએ સિડ પર કાળો જાદુ કર્યો છે. સિડ પાસે કોઈ બેંક ખાતું નથી. અલીઝા મીનુને સિદને બચાવવામાં મદદ કરવા કહે છે.

સિદ્ધાર્થની PR ટીમના સભ્ય સાથે કરી વાત

મીનુએ વધુમાં કહ્યું કે તેણીને વિશ્વાસ અપાવવા માટે, તેણે સિદ્ધાર્થની પીઆર ટીમના સભ્ય દીપક દુબેને ફોન કરીને તેની કોઈ સાથે વાત કરાવવામાં આવી હતી. ત્યારબાદ દીપકે કિયારાની ટીમ મેમ્બર રાધિકા સાથે વાત કરાવી હતી. જે તેને કપલની દરેક માહિતી આપતી હતી. મીનુએ કહ્યું- હું તેને દર અઠવાડિયે પૈસા આપતી હતી. જેથી હું સિદ્ધાર્થ વિશે જાણી શકું અને તેની સાથે વાત કરી શકું.

મીનુની પોસ્ટ સોશિયલ મીડિયા પર વાયરલ થઈ રહી છે. ચાહકો સિદ્ધાર્થને પોસ્ટમાં ટેગ કરીને આ કૌભાંડ વિશે જણાવવા માંગે છે. હજુ સુધી એ જાણી શકાયું નથી કે મીનુએ આ અંગે પોલીસમાં ફરિયાદ કરી છે કે નહીં.