સિંચાઇ અને બાંધકામ માટે રુા.૫૦ લાખ: ગામડાઓના રસ્તાના કામો માટે મંજુરી: સ્માર્ટ કલાસ માટે રુા.૩૦ લાખ, કેટલાક ગામમાં કોઝ-વે બંધાશે

જામનગર જિલ્લા પંચાયતની કારોબારી સમિતીની ગઇકાલે યોજાયેલી બેઠકમાં ૨૦૨૪-૨૫ના રુા.૪.૦૬ કરોડના બજેટને મંજુરી આપવામાં આવી છે, એટલું જ નહીં ૧૫માં નાણાપંચની મુદતમાં વધારો કરવામાં આવ્યો હતો અને સ્માર્ટ કલાસ માટે રુા.૩૦ લાખ, સિંચાઇ અને બાંધકામ માટે રુા.૫૦ લાખ મંજુર કરાયા છે જયારે ગામડાઓના ૪૩ રસ્તા માટે મંજુરી અપાઇ છે અને કેટલાક ગામોમાં કોઝ-વે પણ બનાવવામાં આવશે તેવું નકકી કરવામાં આવ્યું છે.
ગઇકાલે કારોબારી સમિતિના અઘ્યક્ષ ચંદ્રીકાબેન અઘેરાના અઘ્યક્ષ સ્થાને બેઠક મળી હતી જેમાં મયીબેન ગલ્ચર, કે.બી.ગાગીયા, જગદીશભાઇ સાંઘાણી, કાર્યપાલક ઇજનેર કે.બી.છૈયા સહિતના સભ્યો હાજર રહ્યા હતાં. આ બેઠકમાં પંચાયતના એડવોકેટની પેનલ માટેની સતા ડીડીઓને આપવામાં આવી હતી, આગામી નાણાકીય વર્ષના રુા.૪ કરોડ ૬ લાખ ૩૨ હજારના પ્રોજેકટને રજૂ કરાયો હતો. ખાસ કરીને શાળાઓમાં ૩૦ લાખના ખર્ચે સ્માર્ટ કલાસ બનાવવાનું નકકી થયું હતું.
આંગણવાડીના કુપોષીત બાળકો માટે રુા.૧૫ હજારની જોગવાઇને બદલે હવે રુા.૩૦ હજારની જોગવાઇ કરવા નકકી કરવામાં આવ્યું હતું. જયારે અનુ.જાતિ કલ્યાણ માટે કોમ્યુનીટી હોલ બનાવવા રુા.૩૫ લાખની સિંચાઇના કામો માટે રુા.૨૦ લાખ, બાંધકામ વિભાગ માટે રુા.૩૦ લાખની જોગવાઇ કરાઇ હતી, જામનગર તાલુકા પંચાયતના બાકી રહેતા કામો માટે મુદતમાં વધારો કરાયો હતો.
આ ઉપરાંત નંદુરી ગામથી ટેભડા જતાં રસ્તા પર કોઝ-વે, પીપરથી ગોવાણા રોડ ઉપર, લાલપુરથી ગજણા તથા ભોળેશ્ર્વર મહાદેવના મંદિરે જવા રાંધણવા નદી ઉપર બેઠા પુલને ઉંચો કરવા માટે નકકી કરવામાં આવ્યું હતું.