રશિયા-યુક્રેન યુદ્ધ શરૂ થયાને 15 મહિનાથી વધુ સમય વીતી ગયો છે. આ દરમિયાન બંને દેશોની સેનાના લાખો જવાનો શહીદ થયા છે. આ સિવાય યુદ્ધના કારણે બંને દેશોના લોકોને જાનમાલનું નુકસાન પણ સહન કરવું પડે છે. 27 જૂન યુક્રેનમાં પિઝા રેસ્ટોરન્ટમાં રશિયન મિસાઇલથી હુમલો કરવામાં આવ્યો હતો. આ હુમલામાં ત્રણ છોકરીઓ સહિત ઓછામાં ઓછા 11 લોકોના મોત થયા હતા. યુક્રેને પણ આ હુમલા સાથે જોડાયેલા હોવાના આધારે એક વ્યક્તિની ધરપકડ કરી છે.

યુક્રેનની રાષ્ટ્રીય પોલીસે જણાવ્યું હતું કે ગત મંગળવારે સાંજે ક્રમાટોર્સ્ક પર થયેલા હુમલામાં અન્ય 61 લોકો ઘાયલ થયા હતા. આ યુક્રેનિયન શહેર પર નવા હુમલાઓમાંનો એક હતો. વેગનર જૂથના સશસ્ત્ર વિદ્રોહ પછી પણ રશિયા હવાઈ હુમલામાં ઘટાડો કરી રહ્યું નથી.

રશિયામાં વેગનર જૂથ દ્વારા બળવો શમી ગયો છે. આ બળવો વેગનરના માલિક યેવજેની પ્રિગોઝિન દ્વારા કરવામાં આવ્યો હતો. યુક્રેન સામેના યુદ્ધમાં રશિયા વતી વેગનરે મહત્વની ભૂમિકા ભજવી છે. રશિયામાં બળવાને કારણે રશિયાના રાષ્ટ્રપતિ વ્લાદિમીર પુતિનની સત્તા પરની પકડ નબળી કરવાનો પ્રયાસ કરવામાં આવ્યો હતો. આ કારણે વેગનર ચીફ પુતિન માટે પણ ગંભીર ખતરો ઉભો કર્યો છે. જો કે પ્રિગોઝિન પડોશી બેલારુસમાં દેશનિકાલમાં ગયો.

વેગનરે રશિયાને જે નુકસાન પહોંચાડ્યું હતું તેને ઘટાડવાના પ્રયાસરૂપે રાષ્ટ્રપતિ પુતિન ગત મંગળવારે ક્રેમલિન ખાતે લશ્કરી કર્મચારીઓને મળ્યા અને બકરીદની ઇસ્લામિક રજા માટે બુધવારે દાગેસ્તાનના મુસ્લિમ પ્રદેશમાં કેસ્પિયન શહેર ડર્બેન્ટ ગયા.

રશિયાના રાષ્ટ્રપતિ વ્લાદિમીર પુતિને તેમના પ્રવાસમાં પ્રાચીન અને ઐતિહાસિક મસ્જિદની મુલાકાત લીધી હતી. આ સિવાય અધિકારીઓને મળ્યા હતા. નજીકમાં હાજર ભીડને મળ્યો અને લોકો સાથે હાથ મિલાવ્યા. રશિયન નેતા દ્વારા આ એક દુર્લભ વર્તન માનવામાં આવે છે.